Crise na I+D+i

A Conferencia de Reitores das Universidades Española (CRUE) emitiu o pasado 16 de maio un comunicado que comeza coa seguinte frase “A ciencia pode contribuír a atopar respostas para saírmos da crise se se mantén o esforzo inversor na xeración de coñecemento e innovación”. Os organismos internacionais tamén advirten que só os países que invistan en educación e investigación terán unha boa perspectiva de futuro, mais en España non se chega á recomendación do investimento de, cando menos, o 3% do PIB en I+D+i.

Ao facer a análise dos presupostos de 2013, obsérvase que a partida destinada a financiar a I+D continúa a adelgazar (7,22% respecto ao 2012), situándose en niveis de financiación de 2005.

A redución dos orzamentos da Xunta de Galicia no ámbito da educación, afecta seriamente ás universidades galegas, sobre todo á UDC que, no reparto dos cartos, saiu perxudicada. O seu reitor, Xosé Luís Armesto, alerta de que a redución de fondos e as medidas legais impostas por parte das administracións públicas, dificultan o acceso aos estudos universitarios, diminúen  a autonomía da institución e poñen en perigo o desenvolvemento dos proxectos competitivos de investigación.

Exemplos disto son a situación do físico da Universidade de Santiago de Compostela, Diego Martínez, que o mesmo día que foi nomeado mellor físico novo de Europa, viu denegada unha bolsa Ramón y Cajal; ou a da bióloga valenciana Nuria Martí que, tras ser despedida dun centro de investigación español, integra agora o equipo estadounidense creador de células nai de embrións humanos clonados.

Outra mostra, neste caso da dificultade no pagamento dos estudos universitarios, é que a UDC, tras crear unha bolsa excepcional de subvencións para sufragar o gasto da matrícula cun fondo de 15.000 euros (para o estudantado que durante o curso sufriu un problema económico grave), recibiu un total de 26 solicitudes.

Unha boa explicación da situación da investigación en Galicia tédela nesta tertulia do programa Vía V de V Televisión, emitido esta semana.

Para rematar e volvendo parafrasear o comunicado da CRUE, parece claro que "é esencial que se priorice e estabilice o investimento en educación e I+D+i, dotándoas de flexibilidade e desvinculándoas da situación económica do momento".