CRUNIA: O NOVO BUSCADOR DA BUDC

Este luns estreamos CRUNIA, a nova interface de busca de recursos na Biblioteca da Universidade da Coruña.

Este lanzamento implicou un longo traballo para gran parte do persoal deste servizo, engadido as súas labores habituais. Detrás hai moitos horas invertidas, reunións, correos, chamadas, esforzo, traballo en equipo, probas, incertidume, dúbidas, e porqué non dicilo, cabreos e tensión acumulada. Foi unha travesía de meses suxeita a contínuos prazos marcados que implicaban unha vertixinosa superación de fases para ter un produto dignamente rematado (ou en gran parte) este 19 de decembro.

A finalidade é proporcionar unha ferramenta de exploración dos recursos mellor que a que tiñamos, adaptada a distintos dispositivos e que permitira contar cun só punto de acceso/consulta para evitar, na medida do posible, que os usuarios tiveran que interrogar distintos recursos por separado. En gran parte esperamos telo conseguido e seguiremos na senda de tentar mellorar. No proxecto están contempladas importantes melloras como a colaboración entre as tres Universidades Galegas.

Desde Crunia poderedes acceder ao todos os recursos da biblioteca: os recursos físicos (libros, revistas, películas), pero tamén aos recursos electrónicos subscritos e a gran parte do material que hai no RUC (teses, traballos fin de grao e mestrado, e a producción científica do Persoal Docente e Investigador da UDC).

Ata o de agora no antiguo catálogo os usuarios podían buscar recursos fonte, é decir, libros e publicación periódicas, pero non era posible consultar o seu contido. Crunia tamén permíte buscar capítulos e artigos, se é que temos acceso a eles, e consultar o texto completo en moitos casos. Tamén se pode buscar a bibliografía recomendada nas materias que se imparten na UDC.

Esta mellora nas buscas, con funcións avanzadas, busca por voz e posibilidade de aplicar filtros nos resultados, ven acompañada de melloras na exportación de rexistros a xestores bibliográficos e cun espazo máis intuitivo para que os usuarios poidan  xestionar os seus préstamos, facer reservas, solicitar documentos dispoñibles, que antes non podían e consultar o seu historial de lectura. Os usuarios agora poden gardar rexistros e buscas en favoritos, crear alertas para recibir avisos cando ingresen documentos do seu interese no catálogo, e ata poden etiquetar documentos  para clasificalos e acceder máis doadamente a eles.

Podedes consultar o material informativo que elaboramos e que trataremos de enriquecer e completar nos próximos meses.

• Infoguía de Crunia
• Videoguía rápida de primeiros pasos
• Guía de uso (PDF)

Queremos pedirvos comprensión nestas primeiras semanas. Crunia é una ferramenta nova para vós, pero tamén para o persoal e todos/as temos que tentar cambiar antigas rutinas e adaptarnos a un novo xeito de traballar.

Esperamos que este proceso de adaptación sexa levadeiro e o menos frustrante posible, pero durante o tránsito podedes poñervos en contacto co Servizo, tanto coa Biblioteca Central como coas distintas bibliotecas de centro. Trataremos de vos resolver as dúbidas que teñades.

O Servizo de biblioteca no novo curso 2020/21

Coma todos os servizos da Universidade da Coruña, o Servizo de biblioteca tivo que adaptar a súa actuación á nova realidade provocada pola pandemia do coronavirus. Isto provocou desde mediados de marzo unha serie de adaptacións dos seus servizos básicos de atención aos/ás usuarios/as, que foron variando e axustándose de acordo ás medidas sanitarias propostas polos gobernos central e autonómico, buscando sempre a seguridade e a calidade na súa prestación. Para dar conta da evolución destas adaptacións, creouse unha sección específica dentro da nosa páxina web, con información puntual e actualizada sobre as novidades da biblioteca.

Por mor do comezo do curso, dedicaremos esta publicación a proporcionar a información máis destacable sobre a actualidade da Biblioteca universitaria e os seus puntos de servizo, a cal podedes consultar na antedita páxina.

Horarios e prazas

Os diferentes puntos de servizo da biblioteca tiveron que adaptar os horarios de atención presencial ao público e o número de prazas dispoñibles para a consulta e estudo en sala para garantir as medidas de seguridade e de distanciamento social establecidas nesta “nova” normalidade que nos toca vivir. Podedes consultalos na páxina A biblioteca. Os horarios tamén se poden ver na seguinte ligazón, entrando en cada unha das bibliotecas.

Cita previa

Para evitar aglomeracións e racionalizar o acceso ás instalacións, creouse un servizo de cita previa para os servizos básicos da biblioteca de xeito presencial: préstamo, devolucións, consulta e estudo en sala. Tedes acceso a este servizo na sección Pídenos cita previa na nosa páxina web, con ligazóns á todas as bibliotecas do Servizo.

Outros servizos como o asesoramento, as buscas bibliográficas ou a información realizaranse de xeito preferente de forma telemática ou por teléfono, dentro do horario normal das bibliotecas.

Plan de prevención fronte á Covid19

O Servizo de biblioteca elaborou un Plan de Prevención e Hixiene fronte á Covid19 para este curso 2020/21 no que se recollen todas as medidas adoptadas para garantir a seguridade no uso das súas instalacións e servizos, tanto para o persoal como para as persoas usuarias da biblioteca. A modo de resumo, podemos salientar os seguintes aspectos:

• O uso da máscara é obrigatorio en todo momento dentro da biblioteca.
• Manterase a distancia mínima de seguridade de 1,5 metros. Neste sentido, as bibliotecas procederon á sinalización de circuítos de entrada e de saída que deben ser respectados no uso das instalacións. Tamén se puxeron marcas no chan coa distancia mínima aos mostradores de atención ao público e entre as persoas que agardan diante dos mesmos.
• En todas as bibliotecas existen dispensadores de xel hidroalcólico e papeleiras adecuadas para desbotar o lixo, especialmente as máscaras, as luvas e os panos desbotables.
• Realizaranse labores de limpeza, desinfección e ventilación como mínimo dúas veces ao día, especialmente no cambio de quenda.
• Na consulta en sala terán preferencia os membros da comunidade universitaria da UDC, ademais do alumnado das universidades de Santiago de Compostela e Vigo. Será necesario identificarse para acceder á biblioteca.
• O servizo de préstamo realizarase con cita previa en todas as bibliotecas. Na páxina Pídenos cita previa ofrecémosvos un vídeo e unha presentación en Powerpoint explicándovos como realizar o trámite. Por outra banda, os documentos devoltos gardarán unha corentena de 72 h para garantir a súa seguridade. Polo momento non é posible acceder aos andeis onde se atopan os libros e revistas; será o persoal da biblioteca o que realice a busca e recuperación dos fondos que se necesiten.
• As actividades de tipo colectivo, como o uso de salas de traballo en grupo, as formacións ou as actividades culturais, poderán realizarse sempre que se respecte a distancia mínima de seguridade.

E, por suposto, xa sabedes que para calquera dúbida que teñades sempre podedes contactar con nós por correo electrónico, por teléfono, nas nosas redes sociais ou empregando o formulario en liña Contacta coa biblioteca.

SERVIZOS DA BIBLIOTECA DA UNIVERSIDADE DA CORUÑA (I)

A Biblioteca da Universidade da Coruña é unha, aínda que descentralizada[1]. Hai dúas bibliotecas intercentros: a do Campus de Esteiro, na Casa do Patín, e a de Ciencias da Saúde, en Oza; e unha biblioteca de centro por cada unha das demáis escolas e facultades. A parte,

O fin do Servizo de Biblioteca da UDC é poñer a disposición dos usuarios recursos de información para dar soporte ao estudo, á docencia e á investigación[2]. Eses recursos son 850.000 libros, 20.000 ebooks e 46.000 documentos noutros formatos, como DVD, mapas, microformas, etc. A BUDC ten tamén con 9.000 revistas en papel e 17.000 en formato dixital, e 56 bases de datos.

As bibliotecas dos centros contan con seccións BIC (Biblioteca de Interés Cultural), con novelas, ensaios, guías de viaxe, cómics, etc.

A Universidade da Coruña ten uns 25.000 alumnos, polo que a ratio de libros/usuario[3] é de 34. É dicir, cada alumno de grado tería uns 30 libros para escoller. Se todos os alumnos levaran en préstamo o máximo número de libros permitido, 6 libros por 10 días renovables, aínda quedarían máis de 500.000 a súa disposición.

Recursos de información na Biblioteca da UDC

A Biblioteca da Universidade da Coruña ofrece ás súas, aproximadamente, 27.000 persoas usuarias unha extensa colección de libros e revistas en papel (805.000 e 9000, respectivamente), libros e revistas electrónicas (20.000 e 17.000, respectivamente), 42.000 documentos noutros formatos (películas, arquivos de ordenador, mapas, imaxes, …), 57 bases de datos, etc., repartidos entre a páxina web da Biblioteca e os 17 puntos de servizo.

Destacamos o gasto que se fai anualmente en recursos de información, aínda que nos últimos anos estase a ver reducido a consecuencia dos recortes nos orzamentos das universidades públicas. Según as estatísticas de Rebiun, en 2010 gastáronse 2.570.000 euros e en 2012, esta cantidade diminuiu ata 2.171.996 euros.

A cantidade total que se investiu no Servizo de Biblioteca por usuario en 2012, tendo en conta as ditas estatísticas, foi de 240 euros na UDC, 275 euros na Universidade de Santiago, e tamén 240 euros na Universidade de Vigo.

Agora máis que nunca é necesario que aproveitemos os millóns de euros destinados a estes recursos informativos que a Biblioteca da UDC brinda, utilizándoos o máximo posible.

Para aprender a manexar todos estes materiais podedes apuntarvos aos cursos de formación de usuarios que programamos desde a Biblioteca e anunciamos na sección de ‘actualidade’ da nosa web.

ENQUISA DE SATISFACCION DE USUARIOS

O sistema universitario galego está moi interesado en coñecer a opinión dos usuarios das suas bibliotecas. En Vigo estase a desarrollar un sistema de enquisa virtual mediante o blog da Biblioteca; na biblioteca compostelana fíxose unha enquisa e se premiou aos alumnos con libros electrónicos nun sorteo; a UDC está interesada tamén no coñecemento dos seus usuarios.

O grupo de traballo da Carta de Servizos da Biblioteca da UDC está a traballar na elaboración dunha enquisa para valorar o servizos que presta a Biblioteca universitaria. O fin último da enquisa é compendiar os compromisos de calidade que se asumen con respecto a ditos servizos,
Neste sentido, a carta de servizos persegue un dobre obxectivo: Facilitar información aos usuarios sobre os cometidos do servizo e sobre o nivel de calidade que poden esperar del ; e comprobar o grao de cumprimento por parte do servizo dos compromisos que asume e fomentar a mellora continua a partir do grao de satisfacción dos usuarios.