viernes, 26 de febrero de 2021

Centenario de Emilia Pardo Bazán


Este ano conmemórase o centenario do falecemento de Emilia Pardo Bazán, considerada unha das mellores novelistas españolas do século XIX. Como se indica na Biblioteca Virtual Miguel de Cervantes, ademais de novelas e contos, escribiu libros de viaxes, obras dramáticas, composicións poéticas e numerosas colaboracións xornalísticas. Coa súa obra e coa súa vida puxo de manifesto a capacidade da muller para ocupar na sociedade os mesmos postos que o home, sendo precursora das ideas feministas e dos dereitos da muller actuais.

Co gallo deste centenario, na Coruña, a súa cidade natal, celebraranse diversas actividades ao longo de todo o ano, aínda que estas intensificaranse en maio e en setembro, meses do seu falecemento e nacemento respectivamente. Sinalamos a continuación as máis destacadas, aínda que podedes consultar nesta ligazón tódolos actos presentados esta semana polo Concello.

En marzo inícianse as Conversas na Casa-Museo Emilia Pardo Bazán, nas que participarán, ao longo do ano e unha vez ao mes, mulleres procedentes de diversos ámbitos, como Marilar Aleixandre, Susana Seivane, María Xosé Porteiro, etc.

Os espectáculos teatrais tamén están presentes: Amparo, ó outro lado, sobre a figura protagonista da novela La Tribuna, unha das máis eloxiadas de Pardo Bazán e tamén a que garda unha maior vinculación coa Coruña, celebrarase en abril no Teatro Colón. En setembro o Teatro Rosalía acollerá unha representación de La Tribuna e outra de Los Pazos de Ulloa. Finalmente en outubro, Mi Miquiño del Alma terá lugar no Teatro Colón.

Outro acto destacado son os dous congresos internacionais que se celebrarán en setembro: Emilia Pardo Bazán, cen anos despois, organizado pola Real Academia Galega, e Emilia Pardo Bazán no seu centenario. Literatura e vida nos séculos XIX, XX e XXI, organizado por investigadores das universidades galegas e da RAG e que se realizará na Universidade da Coruña. Nese mesmo mes abriranse ao público dúas exposicións ao redor da escritora, unha no Kiosko Alfonso e outra en María Pita. A exposición Emilia Pardo Bazán. El reto de la modernidad  chegará á Coruña despois de pasar pola Biblioteca Nacional de España.

Outras actividades que conforman a programación son concursos, roteiros guiados sobre a vida e a obra da escritora, xornadas gastronómicas, así como actividades na Rede de Bibliotecas Munipais da Coruña, etc. Ademais, dentro dos actos programados para conmemorar o centenario da súa morte, o Concello vén de pintar sobre o asfalto 11 frases da escritora e de persoas expertas na súa escritura en puntos nos que a homenaxeada deixou unha fonda pegada, por exemplo na Fábrica de Tabacos, protagonista en varios dos seus libros, ou na Porta Real, próxima ao seu fogar.

Aínda que non garda relación directa co seu centenario, non queremos rematar esta publicación sen sinalar que a finais do pasado ano tamén houbo un acontecemento relacionado coa escritora que a fixo ser o centro de atención cultural e política, xa que se iniciou o proceso para declarar Ben de Interese Cultural (BIC) a biblioteca de Emilia Pardo Bazán que se atopa repartida entre a Real Academia Galega e o Pazo de Meirás.

Para finalizar, deixámosvos varias ligazóns de interese:

- Casa-Museo Emilia Pardo Bazán: atópase na casa na que viviu a escritora, na Cidade Vella da Coruña. Acolle a sede da Real Academia Galega.

- Real Academia Galega: fondos dixitalizados de Emilia Pardo Bazán

- La Tribuna: Cadernos de Estudos da Casa-Museo Emilia Pardo Bazán: revista de acceso aberto destinada a publicar investigacións orixinais que acrecenten e refinen o coñecemento da figura e da obra da escritora.

- Biblioteca Virtual Miguel de Cervantes: portal Emilia Pardo Bazán: portal con material biográfico, bibliográfico, documental e multimedia sobre a escritora.

- Mujeres en la historia. Emilia Pardo Bazán. RTVE: documental sobre a vida e a personalidade de Emilia Pardo Bazán.

viernes, 19 de febrero de 2021

Revistas depredadoras: que debe saber o persoal investigador


Actualmente atopámonos nun panorama académico moi competitivo, onde o persoal investigador necesita publicar os seus traballos, xa que por unha banda os programas de acreditación avalían as súas publicacións, e por outra banda, necesitan xustificar ante a Administración ou axencias financiadoras os seus avances. Esta necesidade e “presión” por publicar orixinou, entre outras cuestións, que o número de artigos creza a ritmos nunca coñecidos (Prieto Gutiérrez, 2019).

Este panorama favoreceu o xurdimento de falsas revistas científicas ou revistas depredadoras, termo acuñado polo bibliotecario Jeffrey Beall para definir ás publicacións que se caracterizan por publicar artigos sen ser sometidos a un proceso de revisión e avaliación real e cobrando aos autores por iso.

É importante que o persoal investigador coñeza as características e estratexias que seguen este tipo de revistas para evitar caer nelas. As particularidades máis salientables que presentan son:

  • Adoitan utilizar títulos parecidos aos de revistas prestixiosas, incluíndo termos como International Journal of…, Global Journal…, Annals of the World Association of…, etc.
  • Tempos de publicación moi curtos.
  • Captan aos autores mediante frases atractivas, xeralmente a través de correo electrónico.
  • Dubidoso proceso editorial e sen revisión por pares.
  • Adoitan cobrar por publicar. Non se debe esquecer que o principal obxectivo é obter un beneficio económico. Os custos adoitan ser baixos e accesibles en comparación cos prezos elevados que manexan algunhas revistas.
  • Os seus ámbitos temáticos son moi amplos, cubrindo practicamente todos os campos científicos.
  • Fan referencia a supostos índices ou factores de impacto que non son reais.

Nesta pequena guía da Biblioteca de la Universidad de Sevilla podedes consultar máis características, así como unha serie de factores para identificalas.

Por mor de todo isto, xurdiron listaxes que recompilan títulos de revistas depredadoras, e polo tanto, axudan a detectalas. A máis coñecida é a List of predatory journals, que continuou o traballo realizado por Jeffrey Beall tras pechar a súa coñecida lista en 2017.

Con todo, a consulta de listaxes de revistas depredadoras non debe de ser a única opción a seguir cando o persoal investigador enfróntase á dúbida sobre a fiabilidade dunha revista. Tamén é importante verificar as revistas en repertorios e bases de datos internacionais (Scopus, Web of Science, Dialnet, Latindex, DOAJ) e nacionais (Dulcinea ou MIAR).

Ademais existe un sitio web, Think. Check. Submit, que mediante unha sinxela proba (test), axuda ao persoal investigador a identificar revistas e editores confiables para publicar as súas investigacións.

Rematamos esta publicación difundindo un seminario en liña e gratuíto sobre este tipo de revistas que pode ser do voso interese. Está organizado pola UNIR-La Universidad en Internet e terá lugar o vindeiro 9 de marzo. Contará coa participación dun dos principais expertos a escala mundial, Jeffrey Beall, autor da coñecida lista de revistas depredadoras. Require inscrición xa que o número de prazas é limitado.

viernes, 12 de febrero de 2021

Plano de Formación en Competencias Dixitais da Biblioteca Universitaria: cursos dirixidos ao alumnado de doutoramento e ao PDI da UDC


Dende hai anos, a Biblioteca da UDC, a través do Centro Universitario de Formación e Innovación Educativa (CUFIE), presenta un Plano de Formación en Competencias Dixitais que ten como obxectivo que os participantes adquiran as habilidades para acceder, xestionar, avaliar, crear, publicar e difundir información científica de forma ética e legal.

Está formado por dous cursos de modalidade semipresencial que se realizan anualmente (parte virtual na plataforma Campus Virtual UDC e obradoiros presenciais nas bibliotecas dos centros ou a través de Teams pola situación actual da pandemia):

Como este segundo curso terá lugar proximamente, proporcionamos a continuación un esquema xeral dos contidos que se tratarán no mesmo, así como os principais obxectivos que se perseguen. Os seus contidos agrúpanse en catro unidades didácticas:

  • A identificación de autor: nome e filiación
  • A publicación científica
  • A publicación e o acceso aberto. O repositorio institucional da UDC (RUC)
  • Plataformas sociais e redes científicas

Cos obxectivos xerais de:

  • Motivar ao profesorado da UDC a ter unha presenza profesional activa na rede que reflicta de forma precisa as súas actividades e investigacións
  • Promover o uso de boas prácticas á hora de crear unha identidade inequívoca como autor e investigador
  • Informar aos investigadores dos recursos específicos para a creación de perfís identificativos que faciliten a súa visibilidade nas bases de datos e na rede
  • Traballar de forma práctica na creación de perfís e estratexias de visibilidade nos obradoiros

O curso garda relación coa liña 1.7 do obxectivo estratéxico 1 do Plan Estratéxico UDC2020, unha produción científica de calidade (Investigación, Innovación e Transferencia): “Aumentar a visibilidade e mellorar os indicadores da actividade real de investigación e transferencia”.

Para finalizar esta publicación, queremos sinalar que ademais do Plano de Formación en Competencias Dixitais da Biblioteca Universitaria, o CUFIE oferta moitos outros cursos formativos a través do Plano de Apoio á Aprendizaxe (dirixidos a alumnado de grao e mestrado), o Plano de Apoio ao Ensino (para PDI), o Plano de Formación Inicial (para o profesorado novel) ou o Plano de Apoio ao Doutoramento e á Investigación (para alumnado de doutoramento).                                                       

martes, 2 de febrero de 2021

Servizos nas bibliotecas da UDC ata o 17 de febreiro

Dacordo coa Resolución Reitoral, do 27 de xaneiro de 2021, para a adaptar as actividades da Universidade da Coruña ás normativas adoptadas pola Xunta de Galicia con data do 26 de xaneiro de 2021 como consecuencia da evolución da situación derivada da pandemia causada pola COVID-19, coa corrección de erros do 28 de xaneiro, actualmente o servizo das bibliotecas dos centros permanecerá aberto para a comunidade universitaria da UDC, quen poderá utilizalo mediante o sistema de cita previa. Mentres sigan as restricións actuais, as persoas usuarias externas non poderán facer uso dos servizos.

Cómpre destacar que a partir do 8 de febreiro, finalizado o período de exames, as salas de lectura das bibliotecas dos centros permanecerán pechadas ata o 17 de febreiro. Os servizos que se prestarán ata o 17 de febreiro son:

  • Préstamo

É necesario reservar previamente no catálogo aqueles títulos, tanto dispoñibles coma prestados, que se queren levar en préstamo. Neste vídeo podedes ver o procedemento para a reserva dos documentos. As persoas usuarias recibirán un correo electrónico indicándolles cando poden ir recoller o préstamo, e, se o desexan, poderán contactar coa biblioteca por correo electrónico ou teléfono para concretar a data e hora de recollida.

  • Consulta en sala

Do 8 ao 17 de febreiro as salas de lectura das bibliotecas dos centros permanecerán pechadas. Non obstante e neste periodo, o persoal da UDC poderá consultar aqueles materiais que pola súa natureza non se prestan. Será necesario concertar cita previa coa biblioteca por teléfono ou correo electrónico.

  • Préstamo interbibliotecario

O servizo de préstamo interbibliotecario préstase da maneira habitual, tanto para documentos en papel como electrónicos. Podedes atopar máis información sobre este servizo na páxina web do Servizo de Biblioteca na sección Préstamo interbibliotecario.

  • Recursos de información electrónicos

Seguirá ofrecéndose acceso da maneira habitual á colección dixital do Servizo de Biblioteca.

  • Información e consulta

A biblioteca segue atendendo as consultas formuladas polas persoas usuarias a través dos formularios en liña da páxina web:

- Contacta coa biblioteca: para consultas, dúbidas, queixas ou suxestións sobre o servizo ou sobre algunha das bibliotecas.

- Solicitude de adquisicións: para solicitar a compra dunha obra que consideredes necesaria na colección da vosa biblioteca.

- Petición dunha procura bibliográfica: dende este formulario podedes solicitar axuda  na busca de información para os vosos traballos de aula, o TFG/TFM ou os traballos de investigación.

Finalmente, lembrarvos que tamén podedes contactar con nós por correo electrónico, por teléfono ou a través das nosas redes sociais.

viernes, 22 de enero de 2021

O repositorio da UDC cumpre 15 anos

Esta semana, concretamente o día 20, cumpríronse 15 anos da presentación oficial en 2006 do RUC, repositorio institucional da Universidade da Coruña. O repositorio foi creado dentro dun contrato programa da universidade por catro persoas, tres delas persoal bibliotecario da nosa universidade: Xaquín Lores, Carlota Balsa, Javier Uranga e Vicente Guerreiro, este último do Servizo de Informática e Comunicacións. Foi o primeiro das universidades galegas e dos primeiros de España.

Nese mesmo mes e ano a Universidade da Coruña tamén asinaba a adhesión institucional á Declaración de Berlín por proposta da Comisión da  Biblioteca Universitaria, apoiando así as novas posibilidades de difusión do coñecemento.

Ademais, cabe sinalar que coa obrigatoriedade do depósito en acceso aberto da investigación financiada con fondos públicos (a nivel europeo co programa Horizonte 2020 ou a nivel nacional coa Ley de la Ciencia, la Tecnología y la Innovación), os repositorios convertéronse nunha ferramenta fundamental para a difusión en aberto da produción científica.

Ao logo destes anos o RUC consolidouse como unha porta aberta aos recursos producidos polos membros da universidade no seu labor de investigación e docencia, tendo como obxectivo dar maior visibilidade a estas publicacións e asegurar a súa preservación e accesibilidade. Actualmente conta con máis de 22.000 documentos: 6.015 traballos de investigación (deles, 1.702 teses), 6.141 artigos e exemplares de revista editados pola universidade, 3.624 documentos de congresos e cursos da UDC, así como unha selección de traballos finais de grao e mestrado, entre outros.

O RUC estrutúrase en 5 grandes áreas:

  • Investigación: neste apartado recóllense os documentos producidos pola activade investigadora dos membros da comunidade universitaria: teses, artigos, etc.
  • Publicacións UDC: recolle revistas, libros, congresos e cursos editados pola UDC.
  • Coleccións especiais: atópase a Colección Francisco Pillado Mayor, de temática teatral e formada por  imáxenes  dixitalizadas  de  carteis  e  fotografías. 
  • Traballos académicos: traballos de fin de grao (TFG) e de fin de mestrado (TFM)   presentados polo alumnado da UDC e que foron seleccionados polas comisións académicas correspondentes.
  • Docencia: materiais para docencia e obxectos de aprendizaxe creados polo profesorado da universidade no seu labor docente. Esta comunidade tamén recolle documentos xerados nos cursos MOOC da UDC.

Tamén queremos sinalar unha novidade importante que se introduciu o ano pasado no que respecta ao depósito dos datos de investigación. En febreiro de 2020 creouse unha comunidade UDC en Zenodo (repositorio de datos que busca compartir os resultados da investigación froito do financiamento público tanto nun contexto nacional como internacional) para que o persoal investigador deposite aí os datos. O depósito en Zenodo é moi sinxelo e ofrece vantaxes importantes para os investigadores, como obter un DOI para o dataset ou unha gran capacidade de almacenamento.  Ao crear unha comunidade para a UDC tamén se está a ofrecer un punto único de consulta dos datos de investigación da nosa universidade.

Finalizamos esta publicación dando as grazas tanto aos creadores do RUC como ao persoal docente e investigador da UDC pola súa participación e colaboración, facendo posible a ciencia aberta.

viernes, 15 de enero de 2021

Centenario da Revista e da Xeración Nós

No finalizado ano 2020 tivo lugar a celebración do centenario da revista Nós, que deu lugar á denominada Xeración Nós, un dos proxectos culturais colectivos máis singulares de toda a historia da literatura galega. A revista Nós naceu o 30 de outubro de 1920 e supuxo unha revolución no mundo editorial galego, tanto polo seu aberto carácter nacionalista como por pretender normalizar o uso do galego en todos os extractos sociais. Con contidos literarios, artísticos, etnográficos, filosóficos ou de pensamento político, tivo unha profunda pegada na cultura galega.

Ao redor da revista organizáronse un grupo de intelectuais comprometidos co galeguismo que realizaron un valioso traballo de estudo e fortalecemento da cultura e literatura galega: a Xeración Nós, formada por homes como Risco e Losada Diéguez, homes de pensamento; Otero Pedrayo, creador literario; Cuevillas, investigador; Cabanillas como poeta ou Castelao como artista.

Co gallo deste centenario, ao longo destes últimos meses xurdiron diversos proxectos conmemorativos. Algúns dos máis salientables son:

·      Lanzamento do portal revistanos.galiciana.gal, que presenta dunha forma innovadora e moi visual os datos de todas as persoas, lugares, institucións e acontecementos históricos que rodearon á revista Nós durante os seus 15 anos de vida, tomando como referencia a información e as imaxes proporcionadas por Galiciana-Biblioteca Dixital de Galicia. Ademais, este novo sitio dá acceso de forma individualizada á dixitalización da revista.

Aínda que Galiciana xa permitía a consulta dixital de todos os números que se publicaron da revista, un novo proxecto foi a conversión dos exemplares a formato e-book, adaptándose así aos hábitos lectores da sociedade actual. Na actualidade xa están dispoñibles para a súa descarga a través de Galiciana os 100 primeiros números en formato ePub, traballo que continuará ao longo deste ano.

·      Publicación por parte da editorial Galaxia da colección Biblioteca Nós, unha escolma de dez libros dos autores máis representativos da Xeración Nós: Risco, Cabanillas, Castelao ou Otero Pedrayo, entre outros.

·      Anuncio da compra por parte do Museo de Pontevedra dos orixinais do Álbum Nós de Castelao, obra emblemática do autor formada por 49 láminas, o seu autorretrato e o exlibris que pecha o álbum.

·      Exposición Galicia, de Nós a nós, a mostra máis completa sobre a Xeración Nós que chegará ao seu fin os vindeiros días na Cidade da Cultura para posteriormente pasar por Ourense e Pontevedra.

Como curiosidade para rematar esta publicación, queremos sinalar que Nós foi proclamada Palabra do Ano 2020 na elección popular promovida polo Portal das Palabras, proxecto da Real Academia Galega e a Fundación Barrié para a divulgación do léxico da nosa lingua.

miércoles, 23 de diciembre de 2020

Acordos transformativos: negociacións por parte da CRUE e plan de continxencia

Dende hai anos o mundo da comunicación científica está a vivir cambios nos que o movemento do acceso aberto empuxa con forza para que o intercambio de información entre os científicos sexa universal, ó que esixe ter modelos económicos que fagan sostible este sistema. Un dos posibles modelos é o dos acordos transformativos, que se caracterizan por usar o diñeiro tradicionalmente destinado a subscricións para pagar os custos de publicar en aberto (Lluís Anglada, 2020).

Os acordos transformativos implica que as universidades ou as súas bibliotecas pagan para que unha institución teña acceso ás revistas dunha editorial e que o custo de subscrición tamén cubra os gastos de procesamento dos artigos (APC) que os autores da institución pagarían por normalmente publicar o seu traballo en acceso aberto con esa editorial.

Dende hai meses a Crue está a levar a cabo negociacións a escala nacional coas editoriais Elsevier, Wiley, Springer e ACS para alcanzar acordos transformativos para todas as universidades españolas, tanto polo peso económico que teñen estas editoriais para as universidades, como polo feito de que os contratos vixentes con elas finalizan o 31 de decembro deste ano 2020. O obxectivo é alcanzar un acordo transformativo que permita á comunidade investigadora das universidades:

- seguir tendo acceso ás revistas subscritas

- publicar en acceso aberto, sen ningún pago individualizado (APC), os artigos resultado das súas investigacións nas revistas subscritas

- publicar en revistas que sexan de acceso aberto (clasificadas como Gold ou Full OA), coa única condición de que o autor pertenza a algunha das institucións incluídas na negociación

No caso de que no proceso de negociación non se chegue a ningún acordo cunha determinada editorial e consecuentemente non se poda acceder aos seus recursos desde o 1 de xaneiro de 2021, dende o Servizo de Biblioteca podemos recomendar aos investigadores as seguintes alternativas para tentar acceder á información que precisen:

  •  Utilizar o servizo de préstamo interbibliotecario

O Servizo de Biblioteca da UDC ofrece o servizo de préstamo interbibliotecario para localizar e solicitar a outras bibliotecas aqueles documentos (orixinais ou copias) que non forman parte das colecciós das bibliotecas da nosa universidade. Neste caso podería utilizarse para solicitar unha copia do artigo ao cal o investigador quere acceder.

  • Instalar un plugin no navegador

Hai varios plugins que poden instalarse en navegadores como Chrome ou Firefox que indican se existe unha versión dun artigo dispoñible en acceso gratuíto, ben sexa porque está nun repositorio, publicouse en aberto ou a editorial decidise ofrecelo en acceso gratuíto. Entre estas extensións destacan Unpaywall, Open Access Button e Kopernio. Atoparedes máis información sobre elas na páxina Extensións do navegador para acceder a documentos de acceso aberto da web da biblioteca.

  • Buscar o artigo nun repositorio ou buscador científico

É posible que haxa repositorios temáticos ou institucionais nos que os autores depositan copias dos seus artigos, polo que vale a pena comprobar se o artigo que se está a buscar xa está en liña gratuitamente. Na web da biblioteca podedes atopar unha relación dos repositorios de documentos en acceso aberto máis destacados.

Tamén poden ser útiles buscadores científicos como BASE (un dos máis robustos do mundo, especialmente para recursos web académicos) ou agregadores como CORE (que recompila máis de 200 millóns de artigos en acceso aberto de revistas de todo o mundo).

  • Contactar directamente cos autores

O investigador que necesite acceder a un artigo pode contactar directamente co seu autor e  solicitarllo para o seu uso individual, xa que moitos autores comparten o seu traballo se a política de copyright asinada coa revista permítello. O nome do autor e a institución á que pertence adoitan aparecer na páxina de vista previa do artigo na maioría de plataformas editoriais.

Ademais, a través de redes sociais científicas como ResearchGate ou Academia pódese contactar cos autores e solicitarlles unha copia do artigo mediante as opcións que aparecen nesas redes.

jueves, 17 de diciembre de 2020

Elsevier ScienceDirect eBooks


Continuamos informándovos doutro paquete de libros electrónicos adquirido segundo o modelo EBS (modelo de adquisición baseada na evidencia). Despois da difusión dos paquetes de Wiley Online Library, Walter de Gruyter Books e Springer Books, esta semana dámosvos a coñecer Elsevier ScienceDirect eBooks.

Ata o 15 de decembro de 2021 ofrecerase acceso a máis de 7.000 libros da editorial (algúns aínda non publicados), con carácter xeral entre os anos 2016-2021. Ao rematar este período de tempo, mercaranse aqueles títulos máis relevantes tendo en conta as estatísticas de uso.

Ao igual que nos paquetes anteriores, pódese acceder á totalidade de libros electrónicos do editor a través do buscador Pórtico, aínda que para localizar os libros por área de coñecemento recoméndase facelo a través da web de ScienceDirect. Para filtrar as buscas, a plataforma ofrece numerosas disciplinas dentro de catro grandes áreas temáticas: Ciencias Físicas e Enxeñería, Ciencias da Vida, Ciencias da Saúde e Ciencias Sociais e Humanidades. Tamén pódense filtrar os resultados por tipo de material: Books, Textbooks, Handbooks, Reference works e Book series.

Ademais, durante este mesmo período, disporase de acceso a máis de 260 Textbooks de Elsevier, que son manuais de referencia que poden ser útiles como bibliografía a utilizar. De feito, algúns forman parte da bibliografía recomendada nalgunhas materias de clase. Nesta ligazón accédese directamente a eles.

En canto ás opcións de visualización de cada libro, existe a posibilidade de descargar cada capítulo por separado ou ben o libro completo, en ambos casos en formato PDF. Tamén ofrécese a opción de realizar buscas dentro do contido do propio libro.

jueves, 10 de diciembre de 2020

Springer Books


Continuamos informándovos doutro paquete de libros electrónicos adquirido segundo o modelo EBS (modelo de adquisición baseada na evidencia). Despois da difusión dos paquetes de Wiley Online Library e Walter de Gruyter Books, esta semana dámosvos a coñecer Springer Books.

Ata o 15 de decembro de 2021 ofrecerase acceso a máis de 41.000 títulos en inglés de carácter multidisciplinar entre os anos 2016 (2017 ou posterior para algunhas coleccións) e 2020. As ligazóns ás diferentes coleccións son as seguintes: Ciencia da Terra e do Medio Ambiente (1.961 títulos) Ciencia do Comportamento e Psicoloxía (1.088 títulos), Ciencias Biomédicas e daVida (2.594 títulos), Ciencias Sociais (2.992 títulos), Economía e Finanzas (2.362 títulos), Educación (2.566 títulos), Empresa e Economía (1.397 títulos), Empresa e Xestión (2.333 títulos), Enxeñaría (4.086 títulos), Estudos deliteratura, culturais e Medios de Comunicación (2.273 títulos), Física e Astronomía (1.527 títulos), Humanidades, Ciencias Sociais e Dereito (2.209 títulos), Informática (4.538 títulos), Matemáticas e Estatística (2.101 títulos), Medicina (3.442 títulos), Química e Ciencia de Materiais (1.264 títulos), Relixión e Filosofía (1.495 títulos) e Tecnoloxías intelixentes e Robótica (927 títulos).

Pasado o período de tempo citado compraranse os libros máis utilizados segundo os datos de consulta e uso da colección por parte da comunidade universitaria. Os libros permiten un acceso simultáneo ilimitado ás persoas usuarias e a listaxe de títulos podedes consultala a través de Pórtico, portal de acceso aos recursos electrónicos dos que dispón a biblioteca da UDC.

En canto ás opcións de visualización, existe a posibilidade de descargar cada capítulo por separado ou ben o libro completo, en ambos casos en formato PDF. Nalgúns casos tamén se permite a descarga en formato EPUB.

viernes, 4 de diciembre de 2020

Walter de Gruyter Books

A semana pasada difundiamos nesta publicación do blog o EBS (modelo de adquisición baseada na evidencia) de libros electrónicos de Wiley que estará activo un ano. Nesta ocasión informámosvos doutro paquete adquirido segundo este modelo: Walter de Gruyter Books.

Ata novembro de 2021 ofrecerase acceso a máis de 80.000 títulos da editorial de todas as áreas temáticas, aínda que predominan as Humanidades e Ciencias Sociais. Por exemplo, áreas como Ciencias Sociais e Lingüística están representadas con máis de 14.000 e 8.000 libros respectivamente, mentres que outras como Química ou Xeociencias non chegan aos 1.000.

Pasado este período de tempo compraranse os libros máis utilizados segundo os datos de consulta e uso da colección por parte da comunidade universitaria. Os libros permiten un acceso simultáneo ilimitado ás persoas usuarias e a listaxe de títulos podedes consultala a través de Pórtico, portal de acceso aos recursos electrónicos dos que dispón a biblioteca da UDC.

Ademais dos libros publicados pola propia editorial De Gruyter, esta colección inclúe obras doutras editoriais entre as que destacan prestixiosas universidades como Harvard, Princeton, Columbia, Pennsylvania ou Toronto, e algunhas cunha importante colección en Lingüística como Amsterdam, Hawaii ou Iberoamericana Vervuert.

De cada libro amósase un resumo do seu contido e unha táboa de contido de todos os seus capítulos. En canto ás opcións de visualización, existe a posibilidade de descargar cada capítulo por separado ou ben o libro completo, en ambos casos en formato PDF.

Ademais, na propia plataforma do editor (na que se inclúen estes libros, pero tamén outros aos que a biblioteca non ten acceso, así como revistas), posibilítase a busca a través de 30 áreas temáticas baixo o menú “Subject Areas”. De Gruyter ofrece esta pequena guía de uso na que se amosan os elementos principais que contén cada páxina dun título. A plataforma tamén dá acceso a máis de 3.000 libros en acceso aberto.

jueves, 26 de noviembre de 2020

Modelo de adquisición baseado na evidencia (EBS): libros electrónicos na Biblioteca da UDC. O caso de Wiley Online Library


Un dos modelos de adquisición de libros electrónicos máis habitual é a adquisición baseada na evidencia (EBS). Trátase dunha opción vantaxosa para a biblioteca, xa que permite acceder durante un determinado período de tempo á colección do editor en cuestión e, despois deste período, adquirir os libros seleccionados pola biblioteca segundo os datos de consulta e uso dos mesmos. Desta forma, o modelo EBS permite que a biblioteca poida realizar a selección e adquisición dos títulos máis relevantes e interesantes para as persoas usuarias.

A biblioteca da UDC conta na actualidade con dous paquetes de libros de grandes editores contratados a través do Consorcio de Bibliotecas Universitarias de Galicia co sistema EBS: Walter de Gruyter e Wiley; outros paquetes como Springer, Elsevier e Cambridge Core estarán dispoñibles proximamente.

Precisamente de Wiley vén de anunciarse a semana pasada o novo EBS que estará activo un ano, ata novembro de 2021. Este modelo pon ao servizo da comunidade universitaria 23.000 títulos, entre os que se atopan 84 de bibliografía recomendada. Pasado o tempo indicado, seleccionaranse para a súa adquisición en propiedade aqueles libros máis utilizados segundo os datos de consulta e uso da colección. Este é o cuarto ano que se subscribiu un acordo EBS con Wiley, polo que actualmente se accede de maneira definitiva a 1.184 títulos (en 2017 seleccionáronse 298, en 2018 395 e en 2019 engadíronse outros 491 libros).

Para acceder aos títulos que se ofrecen neste novo modelo de adquisición baseado na evidencia, recoméndase facelo a través de Pórtico, portal de acceso aos recursos electrónicos dos que dispón a biblioteca da UDC. Neste portal tamén tedes acceso aos títulos de Wiley mercados pola biblioteca.

Trátase de libros electrónicos de carácter científico de diversas áreas temáticas: Agricultura e Ciencia dos Alimentos, Arquitectura, Arte, Economía, Finanzas e Contabilidade, Química, Informática, Humanidades, Dereito, Ciencias da Vida, Matemáticas e Estatística, Medicina, Enfermaría, Física e Enxeñaría, Psicoloxía, Ciencias Sociais e do Comportamento. Todas estas materias aparecen na páxina de inicio da plataforma baixo a epígrafe “Subjects”, posibilitando filtrar as buscas polas mesmas. Dende esta mesma páxina tamén hai un acceso directo aos máis de 22.000 títulos de libros.

De cada libro amósase unha pequena biografía do autor, un resumo do seu contido e unha táboa de contido de todos os capítulos do libro. En canto ás opcións de visualización, existe a posibilidade de descargar cada capítulo por separado ou ben o libro completo, en ambos casos en formato PDF. Wiley conta con esta páxina de recursos en español onde podedes atopar unha guía de usuario, vídeos autodidácticos e mesmo sesións de capacitación virtual.

Ademais destes libros electrónicos accesibles mediante EBS, a Biblioteca da UDC conta con outras coleccións temáticas e multidisciplinares, ben por compra perpetua ou subscrición. Todas elas pódense consultar nesta ligazón da páxina web.

jueves, 19 de noviembre de 2020

leBUC: nova plataforma de préstamo de libros electrónicos do Servizo de Biblioteca da UDC



Nesta entrada do noso blog presentámosvos a nova plataforma de préstamo de libros electrónicos coa que conta o Servizo de Biblioteca da UDC: leBUC.

leBUC posibilita a lectura en liña e/ou a obtención en préstamo de libros electrónicos a todos os membros da comunidade universitaria, sempre previa identificación da persoa usuaria coas súas credenciais da UDC. A plataforma é compatible con calquera dispositivo electrónico con acceso a Internet: ordenador, tableta, teléfonos intelixentes, etc.

No que respecta aos seus contidos, na plataforma pódense atopar libros de editores comerciais españois e tamén publicacións de editoriais universitarias en virtude do convenio entre a UNE e REBIUN.

O sistema de préstamo é moi parecido ao que se utiliza cos libros en papel: o préstamo dun título implica que ese exemplar figure como prestado e non poderá prestarse a outro usuario en tanto non se devolva ou non finalice o período de préstamo. As condicións do préstamo son as seguintes: pódense prestar ata 3 libros durante 10 días, pódense renovar unha vez, e pódese facer unha reserva sobre exemplares que están prestados. É importante sinalar que o número de préstamos de libros electrónicos non se acumula cos que se teñan prestados en papel.

Unha vez prestado un libro, leBUC ofrece dúas modalidades de lectura:

- Lectura en liña: accédese ao contido a través dun visor e será posible avanzar polas súas páxinas, ademais de destacar fragmentos, facer anotacións, etc.

- Lectura sen conexión a Internet (descarga do libro electrónico): a primeira vez que se desexe ler un libro sen conexión hai que crear unha conta en Adobe e descargar Adobe Digital Editions, que posibilitará ler os libros co DRM (é o sistema empregado polos editores para protexer as obras de copias non autorizadas). Unha vez realizado o préstamo do libro en leBUC, descárgase un arquivo coa extensión .acsm que hai que abrir con Adobe Digital Editions. O libro inclúese na biblioteca de Adobe Digital Editions e xa pode lerse.

leBUC tamén permite ler en móbiles e tabletas. Neste caso requírese a utilización de aplicacións específicas, recomendándose a aplicación gratuíta Aldiko Book Reader.

Ademais, leBUC conta cun espazo persoal (“A súa conta”), onde atoparedes información sobre os vosos libros electrónicos en préstamo, as vosas reservas, buscas gardadas, libros favoritos, etc.

Por último, se queredes ampliar a información ou coñecer con máis detalle o funcionamento da plataforma, recomendámosvos a consulta da guía “leBUC: préstamo de libros electrónicos” elaborada polo Servizo de Biblioteca da UDC.

viernes, 13 de noviembre de 2020

Como evitar o plaxio nos traballos académicos


Para que un traballo académico sexa rigoroso é fundamental documentalo mediante a literatura científica existente. Moitas veces o estudantado non é consciente da necesidade de citar as fontes utilizadas e polo tanto descoñece que está a cometer plaxio. Entre as malas prácticas habituais destacan copiar palabras doutro autor sen utilizar comiñas nin citar a fonte, parafrasear un texto sen citar a autoría ou incorporar imaxes e gráficos sen acreditar a súa orixe. Nesta infografía elaborada pola Biblioteca de la Universidad de Cantabria proporciónanse dez consellos para evitar o plaxio.

No Servizo de Biblioteca da UDC consideramos que facer un uso ético da información e respectar os dereitos de autor é fundamental na aprendizaxe do alumnado, polo que ofrecemos unha serie de recursos para axudar nesta tarefa.

O máis destacado é unha completa guía sobre como citar documentos. Sempre que se utiliza información allea (datos, libros, artigos de revistas, gráficos, etc.) débese facer referencia á fonte orixinal mediante a cita e a referencia bibliográfica. Na guía Citas e referencias bibliográficas atoparedes os estilos de cita máis habituais en función do ámbito temático, como o estilo APA ou MLA, entre outros. Ademais, recentemente vimos de engadir unha nova sección sobre como citar documentos electrónicos.

Tamén podedes utilizar ferramentas de apoio para elaborar a bibliografía, como os xestores bibliográficos, que permiten recompilar nun único espazo tódalas fontes de información que utilizades nos vosos traballos e xerar bibliografías automaticamente. A biblioteca está subscrita ao xestor de referencias bibliográficas RefWorks.

Outro aspecto a destacar é a posibilidade que tedes de empregar contidos con licenza Creative Commons para o material multimedia que utilicedes nos vosos traballos (imaxes, vídeos…). Hai seis tipos de licenzas, e a que vos dará máis liberdade nos vosos proxectos é CC BY, porque permitiravos reproducir, distribuír, transformar e difundir publicamente a obra para calquera finalidade, aínda que segue sendo necesario recoñecer a autoría orixinal. Hai moitos portais que ofrecen contidos baixo licenzas Creative Commons ou de dominio público, como por exemplo Flickr Creative Commons, Pixabay, CC Search, etc. Atoparedes máis plataformas na sección Multimedia na web da biblioteca.

Finalmente, tamén é necesario informarvos de que a Universidade da Coruña conta cun reglamento de sancións que inclúe o suspenso na materia e incluso responsabilidades disciplinarias no caso de plaxio. Así, o texto consolidado das Normas de avaliación, revisión e reclamación das cualificacións dos Estudos de Grao e Mestrado Universitario recolle que “na realización de traballos, o plaxio e a utilización de material non orixinal, incluído aquel obtido a través da internet, sen indicación expresa da súa procedencia e, se é o caso, o permiso do seu autor/a, poderá ser considerada causa de cualificación de suspenso na actividade. Todo iso sen prexuízo das responsabilidades disciplinarias ás que puidese haber lugar tras o correspondente procedemento.”

O control farase mediante o programa de detección de plaxio Turnitin, que é a ferramenta que teñen subscrita as tres universidades galegas e que poñen a disposición dos docentes para detectar o plaxio nos traballos académicos.

viernes, 6 de noviembre de 2020

Repositorios de datos de investigación. A Comunidade UDC en Zenodo.


Nos últimos anos está a haber un interese crecente por publicar os datos de investigación en aberto, en parte para cumprir cos mandatos das axencias financiadoras, pero tamén co fin de favorecer a visibilidade e o impacto da investigación.

Unha cuestión que pode xurdir por parte do persoal investigador da UDC é onde depositar ou publicar os seus datos de investigación. Mediante esta publicación pretendemos amosarvos as opcións dispoñibles, con especial énfase na comunidade UDC en Zenodo creada este ano polo Servizo de Biblioteca. Deste xeito, aos/ás investigadores/as da UDC que queiran poñer os seus datos de investigación de forma aberta ou necesiten cumprir con requirimentos de editores, institucións ou mandatos de financiadores, como o Horizonte 2020, recoméndaselles que depositen os datos de investigación neste repositorio multidisciplinar.

O depósito en Zenodo ofrece vantaxes importantes para os/as investigadores/as, como obter  un DOI para o dataset ou unha gran capacidade de almacenamento. Ao mesmo tempo ofrécese un punto único de consulta dos datos de investigación da nosa universidade. Ademais de na propia comunidade da UDC, e de forma complementaria, tamén é posible depositar noutra comunidade do seu interese ou nun repositorio temático para incrementar a visibilidade.

Una ferramenta interesante para localizar repositorios temáticos de datos de investigación é re3data, que conta cun amplo abanico de materias. Outra fonte de consulta é Fairsharing, buscador de estándares, repositorios de datos e políticas de acceso aberto en tódalas disciplinas. A través doutra ferramenta, Repository Finder, pódense atopar repositorios que albergan datos que cumpren coas directrices FAIR.

Tamén existe a posibilidade de depositar os datos nun repositorio multidisciplinar como Dryad, Dataverse, Figshare ou Mendeley Data.

Outra opción para publicar os datos son as revistas de datos. Pode haber revistas onde só se publican datos e outras que presentan, conxuntamente, artigos e datos. Nestas últimas habitualmente non se recollen os datos completos, senón que se recomenda onde se deben depositar e se enlaza ao repositorio desde o artigo. O Finnish Committee for Research Data ofrece un directorio con este tipo de revistas.

Finalmente, se queredes ampliar a información recomendámosvos a consulta da Infoguía Datos de investigación do Servizo de Biblioteca, así como esta sección da nosa páxina web dedicada a eles. 

viernes, 30 de octubre de 2020

Acceso desde fóra da UDC á colección electrónica da biblioteca

Con esta nova publicación no blog queremos lembrarvos que desde fóra dos espazos universitarios é posible consultar os recursos electrónicos (bases de datos, plataformas de libros e coleccións de revistas) contratados pola biblioteca. Soamente tedes que autenticarvos como membros da comunidade universitaria desde esta páxina, identificándovos coas vosas credenciais persoais da UDC (usuario e contrasinal). Polo tanto este acceso só é válido para os membros da universidade: estudantado, persoal docente e investigador (PDI) e persoal de administración e servizos (PAS). Podedes consultar o proceso nesta guía ou neste vídeo.

Tamén é de interese estoutro vídeo no que se explica como consultar os recursos electrónicos no catálogo da biblioteca. Aínda que a consulta do catálogo é libre desde calquera ubicación, se accededes desde fóra da UDC é preferible que primeiro vos autentiquedes na ligazón indicada anteriormente para poder acceder ao contido dos recursos.

Ademais deste acceso, algúns recursos electrónicos teñen un acceso institucional a través de RedIris, que permite acceder desde fóra da UDC directamente desde a páxina do recurso (é dicir, non é necesario entrar na páxina da biblioteca previamente), premendo nunha ligazón co nome de "Acceso institucional" ou "Acceso Shibboleth" e seleccionando a institución á que pertence a persoa usuaria, neste caso a Universidade da Coruña. Unha vez seleccionada, solicitarase a autenticación co nome de usuario e contrasinal da UDC. Nesta Infoguía podedes consultar a listaxe de bases de datos, revistas e libros electrónicos con acceso institucional. Para cada un destes recursos, tedes na nosa web unha guía do procedemento para realizar este acceso.

O xestor bibliográfico RefWorks tamén permite a autenticación remota dos usuarios/as no seu propio portal a través de Shibboleth. Nesta Guía de autenticación federada en RefWorks podedes consultar o proceso. Así mesmo, os usuarios/as que estean dados de alta no servizo de préstamo interbibliotecario tamén poden empregar o acceso institucional para entrar no seu rexistro. Dentro da páxina web so é necesario seleccionar a opción "Validarse con SIR" e introducir as credenciais da universidade.

Rematamos esta publicación lembrándovos que se necesitades axuda á hora de realizar buscas ou consultas nalgún recurso electrónico, dentro das páxinas de información das diferentes bases de datos e portais dos editores de revistas e libros electrónicos, proporciónanse guías e titoriais de uso de cada unha das plataformas.

viernes, 23 de octubre de 2020

Semana Internacional do Acceso Aberto 2020


Esta semana estase a celebrar en todo o mundo a Semana Internacional do Acceso Aberto (Open Access Week), unha iniciativa anual para sensibilizar sobre os beneficios deste movemento. Grazas a el podemos atopar un gran volume de literatura científica dispoñible en liña para ler, descargar, copiar, utilizar…, sen restricións económicas, legais e técnicas. Este ano ten por lema Abrir con Propósito: Emprender acciones para construir equidad e inclusión estructurales, e por terceiro ano consecutivo está centrada no tema da equidade no coñecemento aberto, destacando a necesidade urxente de levar a cabo accións para alcanzar a equidade e inclusión global no acceso aos resultados de investigación.

Como en anteriores edicións, a Rede de Bibliotecas Universitarias Españolas (REBIUN) difunde de maneira conxunta as actividades realizadas dende diferentes universidades españolas neste portal. Ademais, este ano mediante a iniciativa “Testimonios abiertos” ofrécense distintas experiencias levadas a cabo no ámbito da ciencia aberta durante a pandemia. Outro interesante proxecto que presenta é este kit de REA, unha guía sobre que son, como se crean e comparten os recursos educativos abertos (REA), materiais de aprendizaxe ou de ensino que se atopan en dominio público ou que se crearon baixo unha licenza aberta. Trátase dunha tradución e adaptación ao español do recurso orixinal OER Toolkit, e inclúense explicacións, exemplos prácticos, vídeos, infografías e outros recursos de interese.

Tamén destacamos o portal internacional Open Access Week, creado para o evento nos seus inicios hai trece anos e que co paso do tempo converteuse nunha plataforma de interacción e información a nivel global do movemento polo acceso aberto.

Dende o Servizo de Biblioteca da UDC ofrecemos algúns servizos de apoio á investigación para lograr o acceso aberto dos resultados. É o caso do repositorio institucional, o RUC, que ofrece acceso aberto ao texto completo de documentos creados polos membros da UDC no seu labor de investigación e docencia. Tamén establecéronse acordos con algúns editores grazas aos cales os autores da UDC que desexen publicar en acceso aberto benefícianse dalgún desconto.

Rematamos esta publicación indicando que na web da biblioteca ofrecemos a sección Movemento Acceso Aberto, que inclúe numerosos recursos relacionados con este movemento: repositorios de documentos, revistas e libros en acceso aberto, recursos educativos, etc.

viernes, 16 de octubre de 2020

Xestións en liña na biblioteca da UDC


O Servizo de Biblioteca da UDC ofrece a posibilidade a través da súa páxina web de que as persoas usuarias realicen determinados trámites en liña sen necesidade de pasar pola biblioteca. Aínda que hai xestións que xa levan tempo instauradas, outras implantáronse ou adaptáronse como consecuencia da Covid19, como é o caso da cita previa para determinados servizos. Actualmente, só é necesaria para o estudo ou consulta en sala nalgunhas bibliotecas da universidade.

Unha das ferramentas de gran interese para os/as usuarios/as é O meu rexistro, que dá acceso a distintos trámites: consultar e renovar os préstamos, reservar documentos, consultar e cancelar as reservas, gardar e consultar o historial de lectura (permite saber qué documentos se tiveron en préstamo no pasado), acceder á consulta do catálogo, gardar as buscas preferidas, solicitar alertas por correo electrónico de novas incorporacións ao catálogo, así como crear listaxes con documentos do catálogo que lles interesen. Ademais, por mor da pandemia da Covid19, na actualidade é necesario reservar a través de O meu rexistro aqueles títulos, tanto dispoñibles como prestados, que se queren levar en préstamo. As persoas usuarias recibirán un correo electrónico indicándolles cando poden ir a recoller os documentos. Neste vídeo ou nesta presentación podedes consultar o procedemento para a reserva dos documentos.

No que respecta ás persoas que non son membros da comunidade universitaria da UDC, poden solicitar en liña o carné de usuario/a externo/a para poder acceder ao servizo de préstamo.

Outro trámite que se realiza en liña son as solicitudes do servizo de préstamo interbibliotecario, que ten como obxectivo localizar e solicitar a outras bibliotecas fóra da UDC aqueles documentos (orixinais ou copias) que non forman parte das coleccións das bibliotecas da nosa universidade. Neste pequeno manual pódese consultar o proceso para darse de alta neste servizo, e cada petición que se queira facer realizarase vía web a través deste formulario.

A biblioteca tamén ofrece tres formularios en liña para atender diversas cuestións:

- Contacta coa biblioteca: para consultas, dúbidas, queixas ou suxestións sobre o servizo ou sobre algunha das bibliotecas.

- Solicitude de adquisicións: para solicitar a compra dunha obra que consideredes necesaria na colección da biblioteca.

- Petición dunha procura bibliográfica: para solicitar axuda na busca de información para os vosos traballos de aula, o TFG/TFM ou os traballos de investigación.

Ademais de a través destes formularios, tamén podedes contactar con nós por correo electrónico, por teléfono ou polas nosas redes sociais. Todos estes trámites que citamos tédelos dispoñibles na sección Xestións en liña da nosa páxina web.

Rematamos esta entrada lembrándovos que á parte destes trámites online de carácter xeral, non debedes esquecer a gran cantidade de recursos de información, tanto gratuítos como contratados pola biblioteca, aos que podedes acceder en liña a través da nosa páxina web.  

viernes, 9 de octubre de 2020

Dialnet métricas


 

Recentemente presentouse unha nova edición de Dialnet Métricas, portal que baseándose na análise das referencias bibliográficas citadas nas publicacións existentes en Dialnet, ofrece un conxunto de indicadores para axudar a identificar a relevancia da produción científica nas áreas de Ciencias Sociais e Humanidades. Aínda que o portal está en versión beta, xa ten os procedementos consolidades e conta con datos relevantes.

Esta edición presenta unha considerable ampliación das disciplinas analizadas respecto á anterior. Actualmente xa se inclúen todas as Ciencias Sociais, empezan a traballar nas Humanidades e anuncian que ao longo do primeiro trimestre de 2021 intentarán incorporar as Ciencias Xurídicas.

Ademais, tamén hai cambios na presentación dos resultados, que pretende simplificar a navegación aos usuarios ao presentar dúas entradas principais: unha para o índice de impacto das revistas (IDR), e outra para os demais indicadores relacionados coas citas que recibe cada publicación. Con respecto ao IDR, é un instrumento que permite saber cal é o impacto científico dunha revista, a súa evolución e a súa posición respecto ao resto das revistas da especialidade. Ao igual que os xa cesados índices INRECx, traballa cun conxunto de revistas seleccionadas por un comité de expertos. Na actualidade, apórtase información correspondente a máis de 1.000 revistas publicadas en España, cifra que aumentará nas sucesivas edicións. Tratan de dar cobertura a todas as revistas científicas españolas de cada disciplina, incluíndo tanto as que publican institucións académicas como as de editoriais comerciais, as que están en acceso aberto e as que son accesibles mediante subscrición, etc.

A principal diferenza entre o IDR e os Indicadores Dialnet é que no primeiro soamente se teñen en conta as citas emitidas por un conxunto de revistas nuns anos, mentres que nos segundos se parte do contido completo da base de datos de Dialnet, atopándose polo tanto indicadores de citas doutros tipos de documentos como libros, capítulos de libro ou teses. Nestes indicadores inclúense diferentes rankings de investigadores e publicacións: investigadores máis citados, investigadores por áreas de coñecemento, investigadores por universidades, publicacións máis citadas e referencias bibliográficas por anos.

Cabe sinalar que este proxecto xa empezou a ser usado por algunhas comisións de avaliación da ANECA.

En definitiva, con Dialnet Métricas preténdese controlar o impacto das publicacións en Ciencias Sociais, Humanidades e Dereito realizadas por investigadores españois. Aínda que hai anos que grazas a bases de datos como Scopus ou Web of Science está controlado o impacto internacional das publicacións, nestas tres áreas a maior parte da repercusión adoita proceder do propio país, polo que se pode dicir que ata agora non había unha ferramenta predominante para o control rigoroso das citas españolas nestes ámbitos do coñecemento.