Co fin de lograr o acceso e a
participación plena e equitativa na ciencia para as mulleres e as nenas, a
Asemblea Xeral das Nacións Unidas, mediante resolución do 15 de decembro de
2015, decide proclamar o 11 de febreiro como o Día Internacional das Mulleres e as Nenas na Ciencia, sendo este 2017
o segundo ano en celebrarse.
As universidades galegas
participan activamente nesta homenaxe con diferentes actividades.
A UDC
participa mañá sábado 11 de febreiro ás 11:00 no salón de actos do Centro
Universitario de Riazor nun ciclo de charlas curtas impartidas por profesoras e
alumnas da nosa universidade, que falarán da vida e os logros científicos de
diversas pioneiras en diferentes campos da ciencia. Falarase das matemáticas
María Wonenburguer e Augusta Ada Byron, da enfermeira Florence Nightingale, da
química e cristalógrafa Rosalind Franklin, da arquitecta Lina Bo Bardi, da
bioquímica Esther M. Zimmer e da entomóloga Maria Sybilla Merian.
Xa pola tarde, na Domus, entre as
16.30 e as 19.00 tamén haberá diferentes charlas coa muller e a ciencia como
núcleo central. O programa completo pódese consultar nesta ligazón.
Pola súa banda, a Universidade de Santiago de Compostela
conmemora este día coa inauguración hoxe venres na Biblioteca Concepción Arenal
da exposición “Mulleres no laboratorio: primeiras científicas da USC”,
pretendendo rescatar do esquecemento as primeiras científicas que pasaron pola universidade
e que co seu esforzo e empeño lle abriron as aulas ás mulleres. Poderá
visitarse ata o vindeiro día 24.
Por último, a Universidade de Vigo, organiza unha
serie de obradorios co título Elas
fan CienTec dirixido a rapazas de 3º e 4º de Educación Secundaria
Obrigatoria.
Volvendo a nosa universidade, destacamos
que as bibliotecas da UDC tamén homenaxean
dende hai anos a todas aquelas mulleres que traballaron nos distintos campos da
ciencia. Dende o ano 2013 elabora con motivo do Día Internacional das Mulleres
(o 8 de marzo), a exposición bibliográfica Mulleres
nas Bibliotecas da UDC, na que participan diversas bibliotecas. En cada
unha delas, a exposición céntrase na vida e obra dunha selección de mulleres
relacionadas cos ámbitos científicos de cada unha das escolas ou facultades.
Compleméntase con paneis informativos, lecturas e outras actividades
complementarias.
Se queredes ampliar coñecementos sobre estos temas, podemos comprobar que se facemos unha busca no catálogo
da UDC atopamos nestas bibliotecas diverso material
relacionado coas mulleres
científicas ou coas mulleres
nas ciencias .
No hay comentarios:
Publicar un comentario