A Biblioteca-Arquivo Teatral Francisco Pillado Mayor nace dun
convenio de doazón asinado en 1996 entre o escritor Francisco Pillado Mayor e a
UDC. Trátase dun fondo bibliográfico especializado en teatro, constituído tanto
polos libros e revistas doados por Francisco Pillado como por outros mercados
pola UDC, e que se atopa na Biblioteca
da Facultade de Filoloxía da UDC.
A Biblioteca Pillado é unha colección de monografías e revistas de
teoría do teatro e das artes escénicas, textos de teatro clásico e
contemporáneo, en galego e noutros idiomas.
Os libros datan desde mediados de século XIX, co primeiro texto impreso
do teatro galego, ata os últimos títulos dedicados ao mesmo.
O Arquivo Pillado é unha colección documental que ao longo da súa
traxectoria profesional reuniu Francisco Pillado e que medra cada día con novas
achegas de arquivos privados e persoais, de entidades ou de compañías teatrais
que lle proporcionan periodicamente documentación sobre as súas actividades.
Estes documentos están agrupados no catálogo da Biblioteca da UDC na serie
"Colección Francisco Pillado Mayor", que á súa vez subdivídese nas
seguintes subseries: Arquivo Luís Seoane, Carteis, Compañías, Eventos,
Materiais gráficos e audiovisuais, Música, Organismos, Prensa, Programas de man
e folletos, Publicacións, Representacións e Textos. O acceso a este arquivo
está restrinxido a investigadores, previa autorización da Biblioteca.
Pola súa parte, o Servizo de Publicacións edita unha colección
vinculada coa devandita biblioteca: a colección Biblioteca-Arquivo Teatral
Francisco Pillado Mayor, que ten publicado a día de hoxe 72 títulos.
Cómpre sinalar que toda a
documentación da Biblioteca-Arquivo pode consultarse vía web no catálogo da biblioteca da UDC. A maior cantidade de
rexistros correspóndense cos carteis e cos programas de man e folletos, aínda
que tamén atópanse outras tipoloxías documentais como materiais gráficos e
audiovisuais, prensa, etc.
Ademáis, no Repositorio da Universidade da
Coruña (RUC), dentro do seu apartado Coleccións especiais está accesible a
imaxe dixitalizada da totalidade da colección de carteis e fotografías.
Por último, citamos como material
de interese esta Guía de recursos sobre
teatro, elaborada e mantida polo persoal da Biblioteca de Filoloxía da UDC.
Para obter máis información sobre
este fondo teatral podedes consultar o artigo “Os fondos teatrais da Biblioteca da
Universidade da Coruña”.
No hay comentarios:
Publicar un comentario