A Biblioteca da Real Academia
Galega está especializada na área das humanidades, especialmente nos campos
da historia, folclore, literatura e lingua de Galicia, polo que resulta de gran
interese para calquera achega á cultura galega.
A colección da biblioteca arranca
a finais de 1905, con doazóns feitas por membros da institución e polos propios
autores que foron remitindo as súas obras. O fondo máis antigo o conforman
aqueles que foron expropiados aos monxes na desamortización, procedentes do Convento
de Montefaro, e que foron doados á biblioteca polo Ministerio de Hacienda e a
Real Academia de la Historia.
Destaca a importante colección de
folletos editada pola comunidade galega en América e mais polo tecido
asociativo co que se contaba en Galicia a comezos do século XX. Tamén é
depositaria de bibliotecas individuais como a de Pardo Bazán, Manuel Murguía ou
Luís Seoane. Na actualidade conta con máis de 60000 volumes.
A través da súa web, a biblioteca
ofrece en acceso aberto copias dixitalizadas de Monografías
do século XIX referidas a Galicia polo seu autor, temática ou lugar de
impresión.
Tamén se pon a disposición do
público a denominada Biblioteca Virtual,
unha pequena colección de vintecinco obras dos clásicos galegos, dos que se nos
dá dúas versión en liña: unha en texto html e outra en imaxe jpg, ademáis dunha
imaxe da cuberta de cada obra.
Ademáis destas coleccións
dixitais, a web da biblioteca infórmanos da súa historia e servizos, e aparece
ilustrada con curiosas imaxes como son as primeiras entradas anotadas no libro
de rexistro da Academia por César Vaamonde Lores, primeiro arquiveiro-bibliotecario
da mesma, ou as primeiras edicións dos nosos clásicos galegos, imaxe que
acompaña a este post.
A web tamén conta cunha Hemeroteca que recolle as
principais publicacións periódicas galegas editadas tanto en Galicia como no
exilio, conservando máis de 2.500 cabeceiras de revistas publicadas ao longo
dun período de douscentos anos, aínda que dixitalizadas non chegan á centena. Ó
igual que no caso das monografías, hai revistas que proceden de coleccións
persoais que pertenceron a personalidades como Manuel Murguía ou a Emilia Pardo
Bazán, entre outros.
Tanto na sección web da
biblioteca como da hemeroteca ofrécese un sinxelo catálogo para a busca dos
seus fondos.
Para ampliar a información sobre
esta biblioteca podedes consultar o artigo “A biblioteca da Real Academia Galega:
unha visita virtual”.
No hay comentarios:
Publicar un comentario