Os xestores bibliográficos

No post desta semana tratamos os xestores bibliográficos. Son programas que axudan a estudantes e investigadores na súa tarefa de organizar e xestionar as múltiples referencias bibliográficas que manexan, a crear bibliografías cun formato de cita normalizado ou a compartir referencias con outros usuarios.

Desde os primeros que xurdiron, Procite e EndNote en versión local, apareceron moitos máis en versión en liña ou coas dúas opcións: Zotero, desenvolto polo navegador Mozilla Firefox; Mendeley, tamén aberto e cun potente módulo de estatísticas; Docear, xestor aberto que tamén permite facer anotacións nos textos e traballar con fórmulas LateX, do mesmo xeito que BiBteX; Citavi, programa aberto con moitas funcionalidades para buscar información, citar, organizar o traballo e traballar en equipo, entre outros.

A Universidade da Coruña pon a disposición da comunidade universitaria dous xestores: RefWorks e EndNote.

RefWorks é un produto de pago da empresa Proquest, mantido pola súa división tecnolóxica, ExLibris. Nestes momentos hai dúas versión de RefWorks: o RefWorks Legacy e o Novo RefWorks. Aínda que Proquest non ten pensado pechar o antigo RefWorks no ano 2019, convén pasarse á nova versión. Na web de Proquest temos acceso a manuais e a formación en liña da ferramenta.

O acceso a EndNote vén dado pola Fecyt a través da Web of Science. Existen dúas versións, escritorio e en liña, que se sincronizan entre elas para compartir todas as referencias. A UDC dá acceso a EndNote Basic, ferramenta máis limitada que só ten versión en liña e permite almacenar 50.000 referencias e 2Gb de documentos adxuntos. Nesta ligazón vanse recollendo todas as xornadas de formación de Clarivate Analytics. 

Outros xestores que destacamos dende a biblioteca son: 

- Zotero, xestor de bibliografía gratuíto elaborado con software libre. É un dos xestores con mellor compatibilidade para captar referencias de Internet. 

- Mendeley: xestor de referencias libre e multiplataforma, que dispón de versión local e de versión web, coa posibilidade de sincronizar as dúas automáticamente. O seu módulo de citas facilita moita información sobre os documentos máis populares ou lidos en Mendeley. Tamén destaca como xestor de referencias sociais para compartir o traballo de investigación con colegas, pois ten un módulo de xestión de grupos. 

Nunha INFOguía incluída na web da biblioteca podedes consultar unha táboa comparativa das funcionalidades que ofrecen estes xestores citados.