O Día das Letras Galegas ven tendo lugar tódolos 17 de maio dende 1963. A primeira homenaxeada foi Rosalía de Castro, xa que precisamente nesa data conmemórase o centenario da primeira edición en 1863 da súa obra Cantares Gallegos.
Este ano está dedicado a Carlos
Casares, que naceu en 1941 en Ourense e faleceu en Vigo en 2002. Ademáis de polo seu talento literario,
destacou tamén pola súa implicación na vida cultural, social e institucional do
país. Comezou a súa carreira literaria moi novo, pois en 1965 publicaba os seus
primeiros relatos na revista Grial. Como narrador ocupa un lugar indiscutible na
historia da literatura galega.
Ademáis da súa condición de
novelista, cultivou a literatura para nenos con obras como As laranxas máis laranxas de todas as laranxas, galardoada en 1973
co Premio de Literatura Dramática para a Infancia e a Xuventude da Asociación
Cultural O Facho. Desta obra temos no Fondo Francisco Pillado Mayor da Biblioteca
da Facultade de Filoloxía varias edicións da mesma, ademáis de carteis e folletos de
representacións teatrais da obra que tamén se encontran dixitalizados e
accesibles nesta sección do RUC.
Tamén hai que salientar o seu
papel como biógrafo doutros grandes escritores galegos como Otero Pedrayo,
Vicente Risco, etc., así como de articulista en distintas cabeceiras, recibindo
os premios de xornalismo "Fernández-Latorre" en 1983 ou o "Julio
Camba" en 1995.
Se vos interesa coñecer a súa
obra podedes consultar no catálogo tódolos documentos
que temos del e sobre él na Biblioteca da UDC.
Entre os fitos máis relevantes na
súa biografía destacan o seu ingreso na Real Academia Galega en 1978, a
dirección da editorial Galaxia (1986-2002) e da revista Grial (1988-2002) e a
presidencia do Consello da Cultura Galega (1996-2002). Ademáis, a Xunta de
Galicia recoñeceu o seu enorme labor concedéndolle, en 1989, o premio á
creación cultural.
En canto as actividades commemorativas que se levarán a cabo estes días, a UDC
realiza este xoves 18 un acto ás 19:00 h. na sala de prensa da Reitoría da universidade
con esta programación.
Ademáis, a Biblioteca da Facultade de Filoloxía realizou unha exposición sobre
o autor.
A USC, como tódolos anos dende
2013, dedica un blog a cada figura homenaxeada no día das Letras Galegas. O
deste ano pódese consultar na seguinte ligazón. Pola súa parte, a Universidade de Vigo a
través do seu servizo de televisión por Internet Uvigo-TV, ofrece varios
videos relacionados co homenaxeado.
Tamén dende o Concello de A
Coruña programaron diversas actividades que inclúen concertos, recitais ou
lecturas dramatizadas, que se desenvolverán dende hoxe luns 15. O propio 17 de
maio o Goberno local organizará, por segundo ano, unha lectura pública dende o
balcón do Pazo de María Pita. O programa completo pódese consultar nesta ligazón.
Por último,
destacamos que na web da Real
Academia Galega atópase un amplo apartado dedicado á
historia do Día das Letras Galegas, así como ás biografías e obras de tódolos
homenaxeados ao longo da historia.
No hay comentarios:
Publicar un comentario