No post desta semana continuamos a análise comezada
a semana pasada sobre a evolución da biblioteca da UDC nos últimos 10 anos,
esta vez centrándonos na súa colección. Ao igual que no último post, tomamos o
ano 2017 como último de referencia, xa que é o último dispoñible nas estatísticas de
REBIUN, á espera da actualización das do pasado ano 2018.
Analizaremos as cifras dos principais tipos de
documentos: monografías e publicacións periódicas (tanto en papel como
electrónicas) e bases de datos.
Facendo un pequeno resumo sobre o que ofrece a
biblioteca da UDC ás súas, aproximadamente, 23.600 persoas usuarias, podemos
dicir que pon a súa disposición unha extensa colección de libros e revistas en
papel (862.156 e 9.274, respectivamente), libros
e revistas
electrónicas (111.474 e 27.288, respectivamente), 51.238 documentos noutros
formatos (DVD, mapas…) e 59 bases
de datos, repartida entre a páxina
web da biblioteca e os 17
puntos de servizo.
Comezando cos datos das monografías, os ítems de monografías en papel informatizados (cada
un dos exemplares) son actualmente 862.156. No ano 2007 a cifra
era de 659.534, a cal foi ascendendo paulatinamente ata chegar á cifra actual.
Os volumes
ingresados por compra foron 9.738 no ano 2017. Houbo unha clara diferenza entre
ese ano e o 2007 (no que o número foi de 23.758), posiblemente polo descenso na
adquisición de documentos que comentabamos no anterior post produto dos recortes
nos orzamentos das bibliotecas nos últimos anos. Este descenso podémolo observar
tamén nas outras bibliotecas das universidades galegas: no caso da Universidade
de Santiago de Compostela houbo un descenso de 23.982 volumes no 2007 a 7.807
no 2017; na Universidade de Vigo pasouse de 16.525 no 2007 a 6.402 no 2017.
En canto ás publicacións
periódicas, os títulos ingresados por compra (contabilízanse títulos, non
subscricións), ao igual que no caso das monografías, descenderon dende o ano
2007, no que a cifra foi de 3.007 fronte aos 900 títulos do 2017. Este descenso
tamén é visible nas outras dous bibliotecas universitarias galegas.
Pola súa parte, os títulos das publicacións
periódicas en papel mortas (é dicir, que non se publican ou non se reciben actualmente)
foron en ascenso: os 3.481 títulos do 2007 incrementáronse ata os 7.867 do
2017.
Mentres que o número destas publicacións en papel
foron descendendo, no que respecta á información electrónica sucede todo o
contrario: no caso das monografías
electrónicas houbo un importante ascenso: de 15.074 no 2007 pasouse a 111.474
no 2017. Tamén incrementáronse as publicacións
periódicas electrónicas: de 18.365 no 2007 a 27.288 no 2017.
O último tipo de material que citaremos son as bases de datos: o número que consta no
2017 son 51, fronte as 68 do 2007.
Para finalizar, sinalar que o total de títulos informatizados que figura no 2017 ascende a 611.436,
dos que 85.794 foron informatizados ese mesmo ano. Maiores son as cifras da
Universidade de Santiago, na que constan un total de 1.254.354 de títulos (23.101
informatizados no 2017), e menores na Universidade de Vigo: 436.909 títulos, dos
cales 11.261 informatizáronse nese último ano. Estas cifras refírense ao número
total de títulos (rexistros bibliográficos) de calquera clase de documento, catalogados.
Rematamos o post facendo referencia á infografía “REBIUN en
cifras 2018”, que se edita por segundo ano consecutivo cun resumo dos datos
estatísticos do ano. No que respecta á colección, sinálanse un total de
55.022.365 libros entre o conxunto de bibliotecas que forman parte de REBIUN,
dos que un 23% son electrónicos. Pola súa parte, as revistas suman un total de
2.720.080, que na súa maior parte son electrónicas (un 96%), destacando así a
importancia da súa colección en liña.
No hay comentarios:
Publicar un comentario