Base de datos Scopus: cifras actuais e novidades

Con motivo da sesión de formación presencial sobre a base de datos Scopus impartida por unha formadora especializada de Elsevier e organizada pola FECYT que tivo lugar este pasado luns na UDC, dedicamos o post desta semana a facer un pequeno repaso sobre esta base de datos, achegándovos os datos actuais da súa cobertura así como as últimas novidades da mesma.

Trátase da base de datos máis ampla de resumos e citas da literatura revisada por pares e conta con ferramentas bibliométricas para rastrexar, analizar e visualizar a investigación académica. En Scopus están representadas todas as áreas do coñecemento: ciencia, tecnoloxía, medicina, ciencias sociais e artes e humanidades. Cobre 40 idiomas e ten múltiples tipos de contido: revistas, conferencias, libros ou series de libros.

Actualmente contén máis de 23.500 títulos de revistas de máis de 5.000 editoriais de todo o mundo e 105 países diferentes que fan un total de aproximadamente 70 millóns de artigos. Destas revistas, 3.784 pertencen ao Gold Open Access. Elsevier é a editorial máis representada, aínda que non supera o 11%. A continuación están Springer Nature, Taylor & Francis e Wiley Blackwell.

Tamén inclúe 106.000 congresos, e na área de ciencias sociais e humanidades 613 series de libros e preto de 166.000 libros independentes. Ademais conta con 12 millóns de perfís de autor e 70.000 perfís institucionais.

Nos últimos tres anos, Scopus engadiu 195 millóns de referencias máis citadas desde o ano 1970. Desta manera, aumentou máis a profundidade do seu contido desde 1788. Na actualidade, contén  11,5 millóns de rexistros entre 1970-1995.

Cabe sinalar que Scopus mantén un proceso de avaliación riguroso. Deste xeito, entre 2011 e 2015, só o 48% dos títulos revisados foron aceptados en Scopus.

Entre as novidades de Scopus dos últimos meses destacan as seguintes:

• Inclusión dos SciVal Topic Prominence, que son temas computados en SciVal baseados na análise de rede de citas e cada tema está asociado cunha puntuación que representa o seu estado de relevancia. Estes temas son unha colección de documentos cun interese intelectual común e sirven para mellorar o percorrido para a busca e localización de literatura científica, descubrir documentos relacionados ou atopar os autores máis representativos. 
•  Opción de busca por axencias de financiación 
•  Opción de refinar os resultados na busca de patentes

Para finalizar, deixámosvos esta ligazón na que tedes acceso á presentación da sesión.