viernes, 11 de octubre de 2019

Actividades de extensión cultural nas bibliotecas da UDC

Fotografía dos III Encontros na Terceira Planta, "Mulleres escritoras, Mulleres de cine", na Casa do Patín.

Ao longo do tempo o concepto de biblioteca foi evolucionando e con iso cambiaron tamén as súas funcións e os servizos que ofrecen. Non só serven para estudar e coller libros en préstamo, senón que son moito máis e nelas podedes descubrir moitas actividades de ocio. Así, neste post pretendemos dar a coñecer outra cara das bibliotecas, e máis concretamente, as diversas actividades culturais que as bibliotecas da UDC realizan ao longo do curso académico. As exposicións, clubs de lectura, encontros literarios…son algúns exemplos na súa programación. 

Quizais as exposicións e centros de interese sexan as actividades máis extendidas. Algúns exemplos son as realizadas nos últimos anos pola Biblioteca de Filoloxía, a Biblioteca de Ciencias ou a Biblioteca da Escola Universitaria Politécnica, así como os centros de interese da Biblioteca de Socioloxía e CC. Da Comunicación. Ademais das exposicións individuais realizadas por cada biblioteca, queremos salientar a exposición colectiva que dende o ano 2013 se realiza en varias bibliotecas da UDC: Mulleres nas Bibliotecas da UDC, que xurdiu como homenaxe (con motivo da celebración o 8 de marzo do Día Internacional da Muller) a todas aquelas mulleres que traballaron e traballan nos distintos eidos da ciencia, a cultura, a tecnoloxía ou a arte. En cada biblioteca a exposición se centra na vida e obra dunha selección de mulleres. Compleméntanse con paneis informativos e material interactivo accesible a través da páxina web das bibliotecas.

Por outra banda, a Biblioteca de Ciencias da Educación creou o club de lectura e encontros literarios Nébeda, dirixido a alumnado, PAS e PDI da UDC e tamén aberto ao público en xeral. Para a realización do club a biblioteca conta co Recuncho de lectura, no que se levan a cabo os encontros cos distintos autores e autoras convidados, así como cun espazo virtual de comunicación en liña. O programa 2019/2020 pódese consultar nesta ligazón. Ademais, este espazo se utiliza para exposicións de arte (pintura, fotografía…).
Tamén relacionado co fomento da lectura, as bibliotecas da UDC poñen a disposición dos seus usuarios a sección de Biblioteca de Interese Cultural (BIC), formada por libros de lecer para o tempo libre, principalmente narrativa, pero tamén composta por cómics, ensaios, etc.

Existen outro tipo de iniciativas como os “Encontros na Terceira Planta”, organizados pola Biblioteca Casa do Patín que o ano pasado chegaron á súa 4ª edición. Con eles pretenden dar a coñecer a súa colección dunha maneira máis distendida e participativa e cunha temática concreta en cada encontro.
Tamén a Biblioteca de Oza propón unha iniciativa diferente de enfocar o campo da saúde a través do seu blog PaintHEALTH, que recompila imaxes de obras pictóricas relacionadas co mundo da saúde. 

En definitiva, as actividades anteriores son exemplos dirixidos a que o usuario poida coñecer unha parte da biblioteca que lle pasaba inadvertida e fomentar o interese por este outro tipo de iniciativas que realizan as bibliotecas da nosa universidade. As sinaladas aquí son soamente unha mostra, pero animámosvos a descubrir na biblioteca da vosa escola ou facultade outras actividades coas que vos poden sorprender.

No hay comentarios: