viernes, 20 de marzo de 2020

A Biblioteca da UDC na distancia




Como  xa sabedes, as bibliotecas da UDC están pechadas ata novo aviso por mor da situación xerada polo COVID-19. Con todo, o persoal bibliotecario continuamos traballando dende as nosas casas para seguir atendéndovos (en horario de 9.00 a 19.00 h., segundo a última resolución reitoral). Podedes contactar connosco a través de  diversos medios:
- Correo electrónico: neste  directorio podedes consultar os enderezos electrónicos de tódalas bibliotecas da UDC.
-  Contacta coa biblioteca: formulario en liña a través do que nos podedes achegar calquera consulta ou dúbida que teñades.
- Por teléfono: para coñecer as extensións telefónicas nas que atende cada biblioteca, recomendámosvos consultalo nas súas redes sociais, as cales tamén seguen activas durante este  período.
- Algunhas bibliotecas tamén atenden a través da aplicación Microsoft Teams (consultalo nas súas redes sociais).
Ao estar  pechadas as instalacións, os servizos de préstamo e consulta en sala quedan totalmente suspendidos. Os préstamos que os usuarios tiñan ata o momento de peche, quedaron prorrogados automaticamente ata o 31 de marzo. Os préstamos cuxa data de devolución sexa posterior ao 31 de marzo (é o caso  dos préstamos por curso académico e tamén pode ser o caso dos préstamos de  30 días), evidentemente manteñen a data de devolución orixinal. O préstamo interbibliotecario, segue funcionando pero só para a xestión de solicitudes de documentos electrónicos, non se poderán pedir libros a outras  bibliotecas nin documentos que teñan que ser escaneados. 
A pesar deste peche temporal, a biblioteca pode seguir ofrecéndovos acceso a moitos recursos. Lembrade que dende hai tempo a colección é moito máis que libros en papel e conta cunha gran colección dixital formada por bases de datos, libros e revistas electrónicas, á que podedes acceder dende fóra da universidade autenticándovos  nesta ligazón como membros da comunidade universitaria.
Ademais, algunhas bases de datos modificaron as súas condicións para adaptarse á nova situación. É o caso de AENORmás, que de forma temporal durante un mes e revisable se continuase a situación actual, en lugar dos puntos de descarga físicos habilitados nas bibliotecas, permitirá a descarga das normas dende calquera ordenador conectado á rede da UDC, e  polo tanto, dende as vosas casas autenticándovos previamente.
Do mesmo xeito, varias editoriais científicas están a ter iniciativas poñendo en aberto recursos de interese para a comunidade universitaria. Xa vos informamos delas a través  das nosas redes sociais, pero tamén as poderedes consultar próximamente na sección de Actualidade da web “Recursos en aberto durante a crise sanitaria do COVID-19”.
 Ademais da colección electrónica subscrita, na web da biblioteca tamén se recompilan recursos gratuítos de apoio á aprendizaxe e á investigación: recursos xerais de interese para todas as disciplinas (como bibliotecas virtuais ou buscadores académicos) e recursos por materias concretas.  
Outro recurso de moito interese é o RUC, o repositorio institucional da UDC, onde podedes consultar e descargar o texto completo das teses lidas na nosa universidade, agás que teñan un embargo temporal (período de tempo que o autor solicita, durante o que soamente está dispoñible a referencia e o resumo da tese). Tamén atoparedes máis de 4000 traballos académicos (TFG e TFM), aqueles seleccionados polas comisións académicas correspondentes de cada titulación.
Así mesmo queremos destacar as INFOguías UDC, elaboradas nos últimos anos para ofrecer información de apoio á actividade docente e investigadora. Nelas atoparedes moita información útil para o voso traballo. Por exemplo, no caso dos estudantes a guía de Citas e referencias bibliográficas axudaravos a ver como se redactan as citas e  referencias nun traballo académico; ou no caso de PDI, a Guía para publicar proporciona consellos para seleccionar as revistas máis apropiadas e tratar de maneira efectiva o proceso de publicación.
Xa por último, lembramos que nas redes sociais do Servizo de Biblioteca (Facebook, Twitter, blog), irémosvos informando das novidades da biblioteca nestes momentos e seguiremos compartindo novas e información de interese, ao igual que nas redes sociais das diferentes  bibliotecas de centros. Nestes momentos intentaremos estar para vós tan preto como poidamos, co obxectivo de axudarvos no que estea nas nosas mans durante estas semanas que temos  por diante.

No hay comentarios: