Neste novo post difundiremos as
principais coleccións estranxeiras de libros electrónicos subscritas pola
Biblioteca da UDC: Wiley, Ebsco, Springer e Elsevier. Lembrade que para acceder
a elas dende fóra da universidade é necesario autenticarse previamente coas
vosas credenciais persoais da UDC premendo na ligazón Acceso desde fóra da UDC.
Proporciona acceso a máis de
1.000 títulos de carácter científico, de 17 coleccións temáticas: Agricultura e
Ciencia dos Alimentos, Arquitectura, Arte, Economía, Finanzas e Contabilidade,
Química, Informática, Humanidades, Dereito, Ciencias da Vida, Matemáticas e
Estatística, Medicina, Enfermaría, Físicas e Enxeñaría, Psicoloxía, Ciencias
Sociais e do Comportamento.
A páxina de inicio de cada libro
mostra unha biografía do autor e unha táboa de contido con tódolos capítulos
dese libro, coa opción de descargar cada capítulo individualmente ou ben o
libro completo en PDF.
Wiley conta cunha páxina de recursos en español onde podedes atopar unha
guía de usuario, vídeos autodidácticos e mesmo sesións de capacitación virtual.
A vindeira sesión está programada para o 6 de maio.
Posibilita o acceso e a consulta
de libros electrónicos de temática moi variada, maioritariamente en inglés.
Ademais das tradicionais opcións de busca simple, avanzada e por categoría
temática, ofrece a maiores duas seccións de libros con información relevante e
libros destacados. Dependendo da dispoñibilidade de cada libro, poderán lerse
en PDF ou EPUB. Tamén posibilita un acceso ás páxinas máis relevantes do libro,
e opcións como citar o rexistro, exportalo a un xestor bibliográfico, etc.
Cada mes ofrece diversas sesións
en liña sobre os seus produtos e interfaces. As
sesións en español pódense consultar nesta ligazón.
Tamén queremos sinalar que
durante o período de crise creado pola COVID19, Ebsco e Harvard Business
Publishing chegaron a un acordo para ofrecer ata o 30 de maio acceso ilimitado
e gratuíto a máis de 600 libros en liña da colección de Harvard Business Review Press.
A biblioteca conta con 115
títulos adquiridos en acceso perpetuo que engloban monografías, manuais, actas
de conferencias e outros documentos das seguintes coleccións: Ciencias do comportamento, Ciencias
do comportamento e Psicoloxía, Empresa e Economía,
Empresa e Xestión, Economía
e Finanzas, Educación, Humanidades, Ciencias Sociais e Dereito, Literatura e Estudos culturais e dos medios de comunicación,
Ciencias políticas e Estudos internacionais, Relixión e Filosofía e Ciencias
Sociais.
Estes
libros de Springer pódense descargar en formato PDF ou EPUB.
Para os interesados no eido da
Economía e Empresa, Springer tamén ofrece acceso a unha colección de 234 libros de economía e empresa
co copyright do ano 2008.
A maiores, para facilitar a
docencia en remoto por culpa da crise da COVID19, Springer pon en acceso sen
restricións a través de SpringerLink e ata finais de xuño uns 500 libros de
texto en inglés para dar apoio tanto a docentes como estudantes neste período
extraordinario. Podedes acceder a eles nesta ligazón.
A biblioteca ofrece 294 títulos
seleccionados de libros publicados por Elsevier en 2015 e 2016 en tódalas
coleccións temáticas de Ciencia e Tecnoloxía. Ademais destes 294 libros de
compra consorciada, tamén se pode acceder a 567 libros pertencentes a varias
Book Series. Ao igual que no caso de Wiley, amósase unha táboa de contido con
tódolos capítulos de cada libro, coa opción de descargar cada capítulo
individualmente ou ben o libro completo en PDF.
Tamén como consecuencia da crise
da COVID19, a editorial da acceso libre durante 3 meses aos seus manuais (é
necesario autenticarse previamente para acceder desde fóra da universidade).
Como se detectaron problemas de acceso, proporcionamos esta listaxe cos títulos de cada libro e as
súas ligazóns para poder consultalos dende a casa.
Todas estas coleccións subscritas
poden consultarse nas propias plataformas dos editores incluídas na páxina web
da biblioteca en Libros electrónicos, ou ben a través do
xestor de enlaces SFX de Pórtico. Ademais, tamén están engadidas no
catálogo da biblioteca: Wiley, Springer, EBSCO e Elsevier.
Para finalizar, queremos
salientar que estas son as principais coleccións estranxeiras, pero que a
biblioteca ten subscritas outras que podedes consultar na sección de Libros electrónicos da páxina web. Ademais, a
través da páxina “A BUDC queda na casa” podedes acceder a máis
recursos temporais, entre eles libros electrónicos, aos que a biblioteca está a
ter acceso como consecuencia da situación de confinamento que estamos a vivir.
No hay comentarios:
Publicar un comentario