Reapertura de museos e salas de exposicións na Coruña

Coa chegada da fase 2, o sector cultural da cidade vai retomando a súa actividade presencial. O Museo de Belas Artes, pertencente á Xunta, foi o primeiro en reanudar a súa actividade dende finais da fase 1. Fíxoo con certas medidas como a restrición dun terzo do aforo, non poder tocar ningún elemento do museo ou a imposibilidade de realizar visitas de grupos. A corentena tivo como consecuencia que a exposición temporal “O legado de Maruxa Seoane” se prorrogue polo menos ata o outono.

A Fundación Barrié tamén retomou esta semana a súa actividade cun aforo reducido a un terzo do total. As mostras que o público pode visitar de novo son “Chagall. Fábulas y sueños”, “Francisco Llorens” e unha selección de “La Colección de Pintura Contemporánea Internacional”. Nesta fundación os folletos en pLa Colección de Pintura Contemporánea Internacionalapel substituíronse por códigos QR nas salas de exposición e manterase polo momento a suspensión das visitas guiadas e talleres didácticos.

A Fundación Luis Seoane prevé reabrir as súas portas nos vindeiros días e farao coa ampliación do prazo para ver “Gabinete Voula Papaioannou” e “Mapa de desexos” de Luis Seoane.

Ademais, hoxe venres reabren varias salas de exposicións municipais:

- Casa de Cultura Salvador de Madariaga: inaugúrase a exposición “Desde mi mirada”, de José Yáñez.

- Kiosco Alfonso: poderá visitarse a mostra do artista Miguel Zelada.

- Palacio Municipal de María Pita: acolle unha exposición do pintor Fermín Encinar.

Outros dos museos máis representativos da cidade, os Museos Científicos (que comprenden a Casa das Ciencias, a Domus e o Aquarium Finisterrae), aínda non anunciaron data de apertura, xa que esperan instrucións ao tratarse de centros interactivos. Dende o inicio do confinamento a actividade destes museos continuou a través das redes sociais dunha forma moi activa, difundindo vídeos sobre o coidado dos animais do Aquarium ou observacións astronómicas, entre outros.

No que respecta aos museos históricos, como o Arqueolóxico, está previsto que reanuden a súa actividade o día 2 de xuño.