Unha semana máis, continuamos
presentando os principais recursos ou servizos aos que podedes acceder dende a páxina web da Biblioteca Universitaria.
Nesta ocasión centrámonos na colección electrónica da biblioteca, xa que dentro
da súa colección de recursos de información ofrece unha morea de recursos de
acceso electrónico, que se dividen en bases de datos, libros electrónicos, revistas
electrónicas e hemeroteca dixital.
- Bases de datos
As bases de datos conteñen
información sobre documentos científicos, é dicir, referencias a documentos,
pero tamén moitas delas proporcionan acceso aos textos completos. Poden
utilizarse como ferramenta de busca de artigos de revista, congresos, información
xurídica, etc.
Para todas as áreas científicas
existe algunha base de datos específica (por exemplo, Medline para medicina, Westlaw
para dereito, etc.), pero ademais das bases de datos especializadas na vosa
materia, existen bases de datos multidisciplinares. Entre estas últimas
destacan Dialnet e ÍnDICEs–CSIC no ámbito español e Web of Science e Scopus no ámbito internacional.
O acceso ás bases de datos
subscritas pola biblioteca realízase desde a páxina Bases
de datos da nosa web, onde se atopa tanto un índice alfabético como unha
clasificación por materias.
- Libros electrónicos
A biblioteca proporciona acceso a
un volume cada vez maior de libros en formato electrónico, aumento no que
influíu a situación extraordinaria vivida durante o último ano. A nosa colección
inclúe libros de grandes plataformas editoriais internacionais como Elsevier,
Springer, Wiley…, pero tamén podedes atopar recursos en español como eLibro, plataforma de
libros académicos entre os que se recollen obras recomendadas nas bibliografías
dos diferentes graos e mestrados da UDC.
Ademais, dispoñemos dunha
plataforma para o préstamo de libros electrónicos, leBUC, que ofrece libros de editores
comerciais españois e tamén publicacións de editoriais universitarias en
virtude do convenio entre a UNE e REBIUN.
O acceso aos libros electrónicos
subscritos pola biblioteca realízase desde a páxina Libros
electrónicos da nosa web, onde se atopa tanto un índice alfabético polos
editores como unha clasificación por materias.
- Revistas electrónicas
As revistas son a principal canle
de comunicación da información na maioría das disciplinas, especialmente nas
ciencias da saúde, ciencias da vida, ciencias aplicadas e tecnoloxía.
Unha gran cantidade de títulos de
revistas están publicados por prestixiosas editoriais, e a biblioteca proporciona
acceso a estes paquetes de revistas máis importantes: Science Direct (editado por
Elsevier), SpringerLink (editado por
Springer), Taylor & Francis ou Wiley Online Library (editado por
Wiley).
É importante sinalar que a
subscrición a unha revista non implica o acceso á totalidade dos números
publicados, senón que pode haber só algúns anos dispoñibles.
O acceso ás revistas electrónicas
subscritas pola biblioteca realízase desde a páxina Revistas
electrónicas da nosa web, onde se atopa tanto un índice alfabético polos
editores como unha clasificación por materias.
Para acceder aos libros e
revistas electrónicas tamén podedes consultar Pórtico, portal
de acceso único aos recursos electrónicos subscritos pola UDC.
- Hemeroteca dixital
A hemeroteca dixital recolle os recursos de prensa e noticias subscritos ou contratados en proba. Actualmente proporciónase acceso por subscrición a El País, un dos principais xornais españois, e a PressReader, portal que dá acceso a unha ampla selección de periódicos e revistas de múltiples materias e de ámbito mundial.
Tamén queremos lembrarvos que desde fóra dos espazos universitarios é
posible consultar estes recursos electrónicos subscritos pola biblioteca.
Soamente tedes que autenticarvos como membros da comunidade universitaria desde
a páxina Acceso
desde fóra da UDC á colección electrónica da Biblioteca, identificándovos
coas vosas credenciais persoais da UDC (usuario e contrasinal). Podedes
consultar o proceso nesta guía
ou neste vídeo.
Para finalizar, comentámosvos que ademais da colección dixital subscrita pola biblioteca, dende a páxina Recursos de información da web podedes acceder a outros recursos electrónicos gratuítos, tanto de carácter xeral (buscadores académicos, tradutores…) como organizados por disciplinas.
No hay comentarios:
Publicar un comentario