Primeiros pasos na Biblioteca: recursos destacados

A semana pasada, con motivo da inauguración do novo curso académico, realizabamos unha breve presentación do Servizo de Biblioteca para trasladarvos información de interese xeral, como os principais servizos que ofrecemos. Nesta nova publicación explicamos máis polo miúdo algúns dos recursos ou ferramentas máis destacadas ás que podedes acceder dende a páxina web da Biblioteca Universitaria.

• Catálogo da biblioteca

Unha das ferramentas fundamentais que ten a páxina web é o acceso ao catálogo, que recolle as referencias de todos os documentos que forman parte da colección da biblioteca, incluíndo a ubicación dos exemplares. A colección está composta por libros e revistas en papel, películas, mapas, libros e revistas electrónicas ou bases de datos, entre outros.  

• O meu rexistro

O meu rexistro é unha conta persoal onde se poden xestionar en liña determinados trámites sen necesidade de pasar pola biblioteca. Poderanse realizar as seguintes funcións:

- Ver que exemplares se teñen actualmente prestados

- Renovar os préstamos

- Reservar libros e outros materiais que estean prestados

- Consultar e cancelar reservas

- Gardar e consultar o historial de préstamos

- Gardar as buscas preferidas e crear listaxes con documentos do catálogo que vos interesen

• Bibliografía recomendada

A biblioteca facilítavos localizar a bibliografía recomendada polo profesorado dende un único punto. No catálogo podedes realizar as buscas por profesor/a ou por materia de clase (as materias búscanse en galego).

Nos resultados da busca atoparedes que moitas das materias están duplicadas: a de “Recursos electrónicos” recompila os recursos electrónicos da materia. A outra é a bibliografía recomendada xeral, con todos os recursos, electrónicos e en papel. 

Se tedes dúbidas, neste vídeo explicámosvos como consultala. Nestoutra ligazón tedes outro vídeo sobre a busca e consulta da bibliografía recomendada en formato electrónico.

• Colección dixital da biblioteca

Na  biblioteca hai miles de recursos electrónicos (bases de datos, libros e revistas electrónicas) á vosa disposición, pero queremos destacar algúns que poderán axudarvos desde os primeiros días da vosa estancia na universidade. Entre as diversas plataformas de libros electrónicos, salientamos leBUC, plataforma do Servizo de Biblioteca da UDC que permite a lectura e o préstamo de libros electrónicos a todos os membros da comunidade universitaria, os cales deberán identificarse coas súas credenciais da UDC. Poderase acceder a libros de editores comerciais españois e a publicacións universitarias en virtude do convenio entre a UNE e REBIUN. Outra plataforma de interese é eLibro, plataforma de libros académicos en español entre os que se recollen obras recomendadas nas bibliografías dos diferentes graos e mestrados da UDC.

Dende a páxina web da biblioteca tamén podedes acceder a Pórtico, portal de acceso único aos recursos electrónicos subscritos pola UDC.

Ademais, os recursos electrónicos poden ser localizados polo xeral no catálogo da biblioteca a través da opción Busca en: Recursos en liña. Neste vídeo amosamos como facelo.

• Acceso desde fóra da UDC á colección electrónica da biblioteca

Desde fóra dos espazos universitarios é posible consultar os recursos electrónicos (bases de datos, plataformas de libros e coleccións de revistas) contratados pola biblioteca. Soamente tedes que autenticarvos como membros da comunidade universitaria desde a páxina Acceso desde fóra da UDC á colección electrónica da Biblioteca, identificándovos coas vosas credenciais persoais da UDC (usuario e contrasinal). Podedes consultar o proceso nesta guía ou neste vídeo.