O Servizo de Publicacións da Universidade da Coruña

O Servizo de Publicacións (SPU) é o organismo editorial propio da Universidade da Coruña. Tal e como se amosa na súa páxina web, entre os seus principais obxectivos están difundir a investigación xerada pola institución entre a comunidade científica, apoiar o labor docente do profesorado e o discente do estudantado, e transmitir o coñecemento e a cultura na sociedade en xeral.

As publicacións que edita son de diversa índole: dende revistas ou manuais universitarios ata libros de divulgación. Vexamos a continuación algúns exemplos que podemos atopar:

- Divulgación para todos os públicos a través do cómic.

- Para amantes dos clásicos literarios, recentemente vén de publicar Soño dunha noite de verán de Shakespeare, dentro da colección da Biblioteca-Arquivo Teatral Francisco Pillado Mayor. O volume, unha edición bilingüe, presenta unha nova tradución, contextualizada e anotada.

- Unha colección de manuais.

- Informes como o Estudo sobre a violencia e acoso sexual na Universidade da Coruña, presentado nos actos do 25N, Día Internacional da eliminación da violencia contra as mulleres.

Os datos de tódalas publicacións do Servizo poden consultarse nun catálogo en liña que actualmente non está dispoñible por tarefas de mantemento. Tamén ofrecen a través da súa páxina web unha sección para consultar as novidades editoriais.

É importante destacar que o SPU vén apostando fortemente polo acceso aberto desde hai anos. As publicacións en aberto do SPU poden atoparse no RUC, repositorio institucional da UDC, na comunidade Publicacións UDC. Hai tres coleccións, que responden a unha tipoloxía de documentos diferentes: Congresos e cursos UDC, Libros UDC e Revistas UDC.

As revistas editadas en acceso aberto, ademais de no RUC e na propia páxina web do SPU, tamén poden atoparse no portal OJS de revistas da UDC.  

Finalizamos lembrando que calquera das obras comercializadas polo Servizo de Publicacións poden adquirirse nas librarías. Ademais, as persoas vinculadas á UDC tamén poden conseguilas nos servizos reprográficos da universidade. No Servizo de Biblioteca tamén contamos con exemplares nos nosos fondos.