Este mes de marzo Europeana está a celebrar o Mes da
Historia da Muller compartindo coleccións, proxectos e historias que celebran
os logros das mulleres ao longo da historia e na actualidade. Lembramos que
Europeana é a biblioteca dixital europea, de acceso libre, que reúne
contribucións dixitalizadas de recoñecidas institucións culturais da Unión
Europea.
Así, nesta páxina Europeana reúne
diferentes contidos que abranguen desde galerías, publicacións no seu blog, exposicións
ou seleccións temáticas. Vexamos a continuación algúns exemplos:
Entre as galerías destacamos Women at work, con
fotografías e pinturas que presentan ás mulleres no traballo, reflectindo
cuestións de igualdade, dereitos e equilibrio entre a vida laboral e persoal,
ou Suffragettes,
que destaca a loita feminista pola reforma social e a voz para as mulleres na
política.
No seu blog atopamos numerosas publicacións de interese e de temática moi
variada: desde o artigo “Black
women's jazz legacies in Europe”, sobre o legado que deixaron mulleres
negras no jazz e o camiño que abriron para que moitas outras mulleres tivesen
éxito sen importar a súa cor, ata “Five
of the finest (anti-)heroines from European literature”, sobre grandes
personaxes femeninas da literatura europea. Nel tamén se inclúen publicacións
sobre mulleres concretas como Frida Kahlo,
pintora mexicana que se converteu nunha icona para varios grupos minoritarios e
movementos políticos, incluídas as feministas, a comunidade LGBTQ e os chicanos, ou Rosa
Luxemburgo, unha das grandes revolucionarias do século XX e unha das fundadoras da corrente de
pensamento do socialismo democrático.
Tamén salientamos a exposición Pioneras, sobre
oito destacadas mulleres europeas nas artes, as ciencias e a sociedade, desde
revolucionarias defensoras dos dereitos das mulleres ata brillantes científicas.
Europeana anímanos a descubrir mulleres artistas, científicas e activistas ao longo da historia ofrecéndonos a posibilidade de recibir no noso correo electrónico todos os días durante dúas semanas, unha breve e fascinante historia dunha muller notable.
Ademais deste proxecto de Europeana, nos últimos anos outros portais ou bibliotecas dixitais involucráronse na difusión de contidos sobre a historia das mulleres e o feminismo. Algúns dos proxectos máis destacados son:
- Mujeres en la memoria: colección da Biblioteca Virtual del Patrimonio Bibliográfico composta por unha selección de obras cun nexo común: a figura da muller a través do tempo. A colección está formada por obras que abranguen desde o século XII ao século XXI, divididas en dous grandes fondos: un de carácter bibliográfico e outro de carácter gráfico.
- A nivel local, salientamos o proxecto A Coruña das Mulleres, da Agrupación Cultural Alexandre Bóveda, que quere construír de modo colectivo un fondo documental, gráfico e audivisual sobre a memoria feminina da cidade da Coruña.
No hay comentarios:
Publicar un comentario