Dimisión de Méndez Ferrín na RAG

Triste noticia dentro da cultura galega, Xosé Luis Méndez Ferrín, ata o pasado 13 de marzo presidente da Real Academia Galega, presentou a súa dimisión ao fronte desta institución, a pesar de que varios dos seus membros, entre eles Manuel Rivas, pedíronlle que continuase.

A renuncia, cando aínda lle quedaba casi un ano de mandato por diante, parece que vén provocada por división internas suscitadas a partir da difusión de acusacións de nepotismo que afectaban a Méndez Ferrín e a dous dos seus homes de confianza (o secretario e o tesoureiro da RAG). (Ligazón á nova)

O escritor, que ingresou como académico no 2000 e foi nomeado presidente en 2010, tamén abandonou a súa cadeira de académico, cadeira que ocuparon anteriormente Antonio Fraguas e Castelao, entre outros.

Centrándonos na súa faceta literaria Xosé Luís Méndez Ferrín foi proposto ao Premio Nobel de Literatura en 1999 pola Asociación de Escritores en Lingua Galega. Foi galardoado con premios como o Premio da Crítica de narrativa galega, Premio de la Crítica Española, Premio da Crítica de Galicia, Premio Losada Diéguez ou o Premio Eixo Atlántico. No ano 2008 acadou o Premio Nacional de Literatura da Xunta de Galicia.