No post da semana pasada
analizabamos a oferta académica das tres universidades galegas con motivo da inauguración
a vindeira semana do curso académico 2018/2019. Neste novo post centrarémonos
nas súas bibliotecas, cuxo fin é poñer a disposición dos usuarios recursos de
información para dar soporte ao estudo, á docencia e á investigación.
As tres bibliotecas contan con
coleccións e servizos presenciais e en liña. Para consultar os seus fondos
podemos acceder aos seus respectivos catálogos: o da UDC, USC e UVigo.
Tamén queremos citar os
repositorios institucionais das tres universidades, que ofrecen acceso aberto
ao texto completo de documentos creados polos seus membros no seu labor de
investigación e docencia: o RUC na UDC,
Minerva na USC e Investigo
na UVigo.
Na Biblioteca da USC destacan tanto o seu fondo dedicado a Galicia como
a súa colección histórica. Conta ademais cunha serie de coleccións dixitais, resultado
de diversos proxectos de dixitalización. Os recursos electrónicos contratados
por esta biblioteca agrúpanse en reBUSCa. No caso da Biblioteca da UVigo, a súa biblioteca dixital encóntrase no
apartado de Recursos-e.
Sobre a Biblioteca da UDC falaremos máis amplamente nun próximo post, polo
que simplemente sinalaremos que ofrece unha extensa colección de libros e
revistas en papel, libros
e revistas
electrónicas, documentos noutros formatos (mapas, DVD…), bases
de datos, etc., repartidos entre a páxina
web da biblioteca e os 17 puntos
de servizo.
Tamén é importante facer
referencia ó Consorcio de Bibliotecas
Universitarias de Galicia, que ten como obxectivo fundamental o apoio
continuo aos servizos bibliotecarios das tres universidades galegas a través da
cooperación interbibliotecaria. Isto é posible en parte grazas ós servizos que
proporciona aos usuarios a través do seu portal Bugalicia.
Por último, queremos dar conta da
recente creación do Consorcio
Interuniversitario del Sistema Universitario de Galicia (CISUG), que supón
un paso importante cara a unha maior coordinación da educación superior na nosa
comunidade autónoma. Estará integrado por organismos que xestionan asuntos de
relevancia para o Sistema Universitario de Galicia, como son o propio Consorcio
de Bibliotecas Universitarias de Galicia, o Consorcio para o Desenvolvemento de
Aplicacións de Xestión Universitaria (CIXUG) ou a Comisión Interuniversitaria
de Galicia (CIUG). O edificio do consorcio estará situado no Gaiás e levará o nome
de Domingo Fontán, en homenaxe ao autor do primeiro mapa de Galicia. Ademais de
funcionar como sede do novo consorcio, o edificio Fontán tamén o será da
Axencia para a Calidade do Sistema Universitario de Galicia, e albergará tamén
o Centro Europeo de Investigación en Paisaxes Culturais.
No hay comentarios:
Publicar un comentario