Recentemente a Biblioteca
Nacional de España (BNE) anunciou que terminou a recolección masiva anual do
dominio .es deste ano 2019, polo que con esta publicación queremos achegarvos
información sobre este proxecto que a BNE vén realizando dende 2009 e que ten como
obxectivo rastrexar o dominio .es, sen exclusións nin seleccións, para obter un
panorama global ou “foto fixa” da web española.
Podemos comezar sinalando que ao
igual que é importante gardar unha serie de exemplares dos libros editados nun
país, tamén o é facelo do que se publica en Internet, sobre todo tendo en conta
que a información en liña é especialmente efémera, é dicir, que é de curta duración ou pasaxeira. Ao contrario do
que poida parecer, é trascendental preservar esta información para as
xeracións futuras de investigadores, dende prensa dixital, sitios web
institucionais, vídeos…e por que non, ata os memes. De feito, a BNE os conserva
xunto a outros elementos virtuais como tuits ou fotografías de Instagram polo
seu valor documental para o futuro, xa que esta información poderá reflectir
unha sociedade ou un momento histórico determinado.
Como diciamos, en 2009 a BNE deu
o primeiro paso na construción do Archivo de la Web Española
coa sua primeira recolección masiva anual. Estas recoleccións de páxinas web
realízanse con robots rastreadores que percorren as URL e gardan todo o que
atopan enlazado, coa frecuencia, profundidade e tamaño que se determine. As
recoleccións buscan reproducir con detalle o aspecto e as funcionalidades que o
sitio presenta no momento da captura, intentando proporcionar unha experiencia
de navegación o máis parecida posible á orixinal.
Xunto ás recoleccións
masivas, a BNE tamén realiza recoleccións
selectivas, que son de tres tipos: temáticas, de evento e de risco. As
temáticas teñen o obxectivo de capturar unha selección de recursos sobre un
tema; as de evento son sobre acontecementos de especial relevancia para a
sociedade española (a abdicación de Juan Carlos I, os procesos electorais…); e
as de risco realízanse no caso de risco de desaparición de sitios web.
Ademais, as Comunidades
Autónomas elaboran coleccións temáticas cos recursos que consideran
necesario conservar como parte do depósito legal do seu ámbito competencial. No
caso de Galicia
inclúense dende asociacións, museos…ata medios de comunicación ou blogs.
Toda a información conservada no
Archivo de la Web Española pódese consultar nas salas da BNE e nos centros de
conservación das Comunidades Autónomas, en computadores especialmente
habilitados para iso. No caso da nosa comunidade autónoma, o centro de consulta
é a Biblioteca de Galicia en Santiago de Compostela. Con todo, dende Internet
ou dende terminais non autorizados, é posible acceder á ferramenta de busca e ver se
un sitio web foi arquivado e en que datas se capturou. Ademais, o contido
das recoleccións selectivas tamén se pode consultar no sitio web da BNE.
Máis información:
No hay comentarios:
Publicar un comentario