Na situación extraordinaria que
estamos a vivir na actualidade, os servizos e recursos dixitais da Biblioteca
da UDC están a cobrar gran importancia para non deixar de atender as
necesidades de consulta tanto para o estudo como para a investigación. Na web
da biblioteca creamos a páxina “A BUDC queda na casa”, na que se recollen
todas as novas relevantes para os nosos usuarios en canto a prestación de
servizos e recursos en liña mentres dure a situación de confinamento. Nela
figuran os “Recursos en liña da BUDC”, e para acceder a
eles só é necesario autenticarse previamente premendo na ligazón Acceso desde fóra da UDC. Entre estes recursos atópanse os libros
electrónicos, sempre dispoñibles para a súa consulta, pero que nestes momentos
seguramente incrementarán o seu uso. Do conxunto de libros electrónicos dispoñibles na colección
subscrita pola Biblioteca, neste post queremos destacar a plataforma eLibro, da que a Biblioteca vén de subscribir
un novo acceso.
Trátase dunha plataforma con máis
de 100.000 libros electrónicos académicos en español de tódolos ámbitos
temáticos, dirixida ao estudantado, profesorado e persoal investigador, entre
os que se recollen obras recomendadas nas bibliografías dos diferentes graos e
mestrados da UDC.
Aínda que para realizar buscas ou
ler libros en liña non é necesario estar rexistrado na plataforma, para
utilizar algunhas funcionalidades de eLibro sí que é imprescindible crear unha
conta persoal na mesma, preferiblemente co correo institucional. Estas funcionalidades
inclúen:
- Descarga de libros baixo unha modalidade de préstamo
- Gardar nun estante persoal as ligazóns a libros de interese
- Escribir anotacións ou resaltar en cores parágrafos dentro dos libros
- Crear carpetas (no estante persoal) que permitirán organizar os libros de interese
- Compartir carpetas ou enviar por correo electrónico a información coas ligazóns aos libros que gardamos
Para crear unha conta persoal en
eLibro será necesario premer na ligazón “Registrarse” que se sitúa no menú
superior dereito.
eLibro ofrece catro tipos de
busca: rápida, avanzada, filtrada e por temas. Pódese refinar a busca usando
filtros e unha ampla gama de criterios que inclúen: autor, editorial, data de
publicación, etc.
De cada libro o usuario ten
dispoñible ata o 40% do mesmo para copiar ou imprimir a PDF o texto, restrición
que se impón en canto á protección dixital de dereitos de autor.
A páxina de detalles de cada
título prové información acerca da cantidade de copias que ten a institución,
os permisos de copias/impresión de páxinas e se o libro está dispoñible para a
lectura en liña e/ou a descarga completa. Na maioría dos casos os libros teñen
acceso ilimitado.
Ademais, os libros electrónicos
de eLibro que son bibliografía recomendada están
incorporados ao catálogo da biblioteca.
Para coñecer o uso da plataforma,
estes días realizáronse sesións de formación sobre a mesma, dirixidas tanto ao
estudantado como ao PDI. Posibles futuras sesións anunciaranse na sección de
Actualidade da web da biblioteca, así como nas nosas redes sociais.
Con todo, se non puidestes
asistir, a plataforma pon á vosa disposición este material de
axuda, así como estes vídeos
nos que presentan a plataforma, exemplifican como realizar buscas ou dan conta das
ferramentas para a lectura online e offline, entre outros.
No hay comentarios:
Publicar un comentario