Hoxe 23 de abril conmemórase a
celebración do Día do Libro, fixado pola UNESCO dende 1995 nesta data, por coincidir
co falecemento de Miguel de Cervantes, William Shakespeare ou Garcilaso de la
Vega. Cada ano, xunto con organizacións profesionais do mundo do libro, elixen
unha capital mundial do libro: este
ano recaeu en Kuala Lumpur (Malasia) que “foi seleccionada polo seu enfoque centrado
na educación inclusiva, o desenvolvemento dunha sociedade baseada no
coñecemento e a lectura accesible para todas as partes da poboación da cidade”.
Como curiosidade, contámosvos que
o Día do Libro non sempre foi en abril: a primeira vez que se celebrou foi o 7
de outubro de 1926. Se queredes saber por que, e como o contou a prensa aqueles
primeiros anos, cóntannolo neste post da Biblioteca Nacional de España.
Este ano a celebración será
atípica, pero aínda así moitas institucións buscaron solucións para celebrar
este día de forma virtual.
O cartel elixido este ano polo Ministerio
de Educación, Cultura y Deporte para conmemorar este día,
e que acompaña a
este post, foi deseñado polo Premio Nacional de Ilustración, Paco Giménez.
Dada a imposibilidade de realizar
a tradicional cerimonia de entrega do Premio
de Literatura en Lengua Castellana Miguel de Cervantes, o Ministerio puxo
en marcha distintas iniciativas en homenaxe ao Premio Cervantes 2019, Joan
Margarit, entre as que se atopa un vídeo-homenaxe no que personalidades de
distintos perfís (editores, autores, libreiros...) que ían estar convidados á
cerimonia de entrega, enviarán vídeos breves nos que expresarán a súa relación con
Margarit e a súa obra.
Ademais, anima a que se compartan
fotos do voso “Rincón de lectura” co hashtag #RincónDeLectura xunto co xenérico
#DíaDelLibro. Outros actos do Ministerio pódense consultar nesta ligazón.
O Instituto Cervantes tamén
ofrece moitos proxectos en liña englobados baixo o lema xeral La libertad es
una librería, título dun verso de Joan Margarit. Hoxe xoves 23 a directora
de cine Isabel Coixet participará ás 19:00 a través do canal de
Instagram nun encontro cos lectores. O Instituto tamén
ofrece ao longo destas semanas audiolibros gratuítos, lecturas de pasaxes do Quijote
ou opinións de máis de 70 profesionais destacados da cultura. A información
sobre estes eventos pódese consultar nesta ligazón.
No que respecta á nosa comunidade
autónoma, as bibliotecas públicas da Xunta celebran este día cunha programación
en liña para o fomento e dinamización da lectura. Entre as accións que se
levarán a cabo figuran concursos en redes sociais, exposicións virtuais,
publicación de catálogos ou recomendacións por parte do persoal das mesmas.
Nesta ligazón podedes ampliar a información.
As Bibliotecas Municipais de A
Coruña tamén se suman á celebración coa campaña "Mollámonos polo libro", coa que apostan
polo acceso universal á cultura e preparan actividades que difundirán a través
de medios convencionais para achegarlle a lectura á cidadanía que non se manexa
nas redes. Así, presentarán "Lemos para ti", un conxunto de
narracións orais que o persoal das bibliotecas difundirán a través da súa canle
de Spotify e na radio, un medio imprescindible para que a cidadanía menos
familiarizada coas redes poida desfrutar da literatura.
No hay comentarios:
Publicar un comentario