Galiciana: biblioteca dixital de Galicia

Nesta nova publicación do blog falámosvos de Galiciana, a biblioteca dixital de Galicia. De libre acceso para os usuarios/as, o material que contén destaca polo seu valor para a historia, o patrimonio, a ciencia, a lingua e a cultura de Galicia.

Galiciana integra, ademais de fondos propios da Biblioteca de Galicia, obras dixitalizadas en colaboración coas principais bibliotecas patrimoniais galegas. Nela pódense consultar recursos dixitalizados en institucións culturais tan importantes para Galicia como a Universidade de Santiago de Compostela, o Museo do Pobo Galego, a Fundación Penzol de Vigo, a Real Academia Galega, o Seminario de Mondoñedo ou a Biblioteca de Estudos Locais da Coruña.

A súa colección estrutúrase nos seguintes apartados: Monografías, Hemeroteca, Cartografía, Manuscritos, Ilustracións e fotos (carteis, tarxetas postais e ephemera), Arquivos persoais (custodia os arquivos de Camilo Díaz Baliño e Carlos Casares), Rexistros sonoros, Rexistros audiovisuais e Música impresa.

Galiciana ten actualmente 220.503 obras, das que 163.701 son libros e o resto xornais, revistas, artigos, manuscritos e material non librario: mapas, materiais sonoros, ilustracións ou fotos, entre outros. Os datos desagregados pódense consultar na sección Estatísticas.

Segundo datos recollidos nesta entrevista á xefa de servizo da Biblioteca de Galicia, en Galiciana os documentos máis antigos son o manuscrito “Legenda Aurea”, do Beato Jacobo de Vorágine, do século XIV; e o incunable “Sermones de patientia in Job”, de 1471.

Un dos contidos máis destacados desta biblioteca dixital é a prensa histórica galega. Un dos xornais máis consultados polos estudosos e persoal investigador é El Correo gallego, o cuarto máis antigo de España.

Co obxectivo de darlles unha mellor difusión a determinadas coleccións, en Galiciana creáronse micrositios especializados. Algúns deles son:

- Emilia Pardo Bazán: creado o pasado ano 2021 co gallo do centenario do falecemento da autora, reúne 90 obras dixitalizadas.

- Xacobeo: reúne documentos que teñen como temática o Camiño de Santiago, o Apóstolo e a cidade de Compostela.

- Fondo Estudos Locais A Coruña: é o resultado do proxecto de dixitalización dos fondos da Biblioteca Municipal de Estudos Locais da Coruña, na que se conservan todo tipo de publicacións relacionadas coa cidade da Coruña. Inclúense desde documentos dos séculos XVII ao XIX ata publicacións seriadas galegas, principalmente coruñesas, que reflicten a realidade histórica da Galicia decimonónica e de principios do século XX.

- Real Academia Galega: reúne arredor de 900 títulos de monografías e publicacións periódicas fruto da dixitalización dos fondos da RAG. Esta colección resulta de consulta obrigada para calquera achega á cultura galega, xa que se trata dunha biblioteca especializada na área das humanidades, especialmente nos campos da historia, folclore, literatura e lingua de Galicia. Entre os fondos inclúense cabeceiras de revistas publicadas ao longo dun período de douscentos anos.

- Grandes clásicos da literatura galega: forman esta colección 43 títulos de obras clásicas da literatura feita en Galicia, en galego e castelán, de autores/as como Rosalía de Castro, Curros Enríquez, Eduardo Pondal, Sofía Casanova ou Emilia Pardo Bazán, entre outros. As obras pódense descargar en tres formatos: JPEG, PDF e ePub.

- Festas de Galicia: permite consultar programas de festas das principais cidades de Galicia publicados entre os anos 1880 e 1958, permitindo achegarnos á vida cultural e social desas épocas.

Os demais micrositios dispoñibles en Galiciana pódense consultar nesta ligazón.

Galiciana é un proxecto en continua actualización e crecemento que pretende que o patrimonio bibliográfico galego teña cada vez máis presenza na rede. De feito, esta semana veñe de anunciarse a incorporación de 700 novos documentos. 

Para finalizar, cómpre mencionar que o proxecto Galiciana tamén está composto polo Arquivo Dixital de Galicia e polo recolector de metadatos do Patrimonio Dixital de Galicia.