Tras o terrible accidente de tren do pasado 24 de xullo,
desde a Biblioteca da UDC queremos
manifestar o noso apoio e pésame ás persoas feridas e aos familiares e amigos
destas e da xente falecida.
Foi destacable nesta traxedia a solidariedade
de toda a sociedade: veciños que desmontaron as súas portas para utilizalas
de andas, persoal sanitario en paro que acudiu aos hospitais a botar unha man,
bombeiros que suspenderon unha folga para axudar, máis dun milleiro de doadores
de sangue, etc.
Moi relacionado coa solidariedade atopamos o voluntariado:
- Na Universidade da Coruña contamos coa Oficina de Cooperación e Voluntariado, que conta con proxectos en hospitais, proxectos con menores, con poboación sen teito, con persoas con discapacidade e con persoas inmigrantes.
- Na Xunta de Galicia existe o servizo de Voluntariado Galego no que podemos destacar o programa Voluntariado cultural, que se vai iniciar nas bibliotecas nodais das catro provincias galegas e consistirá en apoiar os programas de animación da lectura, apoiar o servizo de formación para o acceso á información, e en ampliar os servizos de difusión cultural destas bibliotecas.
- Nas bibliotecas municipais da Coruña existen tamén, dentro da Oficina Municipal do Voluntariado do Concello, varios programas de voluntariado en bibliotecas: promoción de bibliotecas escolares, préstamo a domicilio, clubes de lectura e bibliopraza.
No hay comentarios:
Publicar un comentario