Neste post e nos vindeiros
centrarémonos nos servizos que ofrece a biblioteca da UDC. Neste faremos un
resumo dos principais, aínda que algúns deles serán tratados con máis
profundidade nas próximas semanas pola relevancia que teñen, como poden ser o
préstamo ou a formación de usuarios. Na web da biblioteca lístanse 8 servizos:
O apoio
á investigación (recursos de información e servizos de apoio para o
persoal investigador) e o apoio
á aprendizaxe (recursos de información e servizos de apoio para o
alumnado) tratáronse xa ampliamente fai unhas semanas neste blog, polo que non
incidiremos máis en eles.
Outro servizo é o de adquisicións,
que permite aos usuarios solicitar obras que consideren de interese a través
dun formulario web. Soamente tedes que introducir os datos que coñezades sobre
a obra e seleccionar a biblioteca na que consideredes que debe figurar. A
biblioteca valorará as vosas propostas.
O servizo de información
brinda ao usuario a posibilidade de contactar coa biblioteca para facer
consultas relacionadas con calquera recurso ou servizo que ofrecemos, así como
información xeral: horarios, normas, organización e localización dos
fondos, funcionamento e manexo do
catálogo ou doutras fontes documentais, etc. As consultas poderán facerse
presencialmente en calquera das bibliotecas da UDC ou vía web a través deste formulario
de contacto.
En canto á formación
de usuarios, a través deste servizo a biblioteca pretende conseguir
que os usuarios coñezan e utilicen cada vez máis os nosos recursos. Como
resultado do uso destes mellorará a calidade do aprendizaxe do alumnado e a
capacidade investigadora do persoal
docente e investigador. Para iso ofértanse diversos cursos, dende cursos de
iniciación para alumnos ata outros máis avanzados e especializados para
doutorandos e PDI.
Pola súa parte, o servizo de préstamo
ten por finalidade optimizar o uso da colección das UDC, permitindo que os usuarios
da biblioteca poidan ter os documentos durante un tempo limitado. O número de
obras que poden ser solicitadas en préstamo e a duración deste variará en
función da tipoloxía de usuario á que se pertenza (estudantado de grao, de
másteres, PDI, autorizados externos, etc.). Algunhas das bibliotecas da UDC
ofrecen ademáis do préstamo usual de libros e documentos, o de lectores de
libros electrónicos e o de ordenadores portátiles.
Dentro do préstamo é importante
que coñezades o préstamo
interbibliotecario, que ofrécevos a posibilidade de solicitar a
outras bibliotecas aqueles documentos (orixinais ou copias) que non forman
parte das coleccións das bibliotecas da nosa universidade.
Por último, mediante o servizo de
doazón
de publicacións, a biblioteca ofrece unha selección de documentos
que por diversas circunstancias (duplicados, non pertinencia para a nosa
colección, etc.) non necesita, por se fose de interese para algún particular ou
institución.
No hay comentarios:
Publicar un comentario