Se a semana pasada analizabamos a
oferta académica das tres universidades galegas con motivo da inauguración do
curso académico 2017/2018, esta centrarémonos nas súas bibliotecas, cuxo fin é poñer
a disposición dos usuarios recursos de información para dar soporte ao estudo,
á docencia e á investigación.
As tres bibliotecas son o que se
coñece como bibliotecas híbridas, é dicir, con coleccións e servizos
presenciais e con coleccións e servizos en liña. Os fondos de todas elas
pódense consultar a través dos seus respectivos catálogos: o da UDC, USC e UVigo.
Na Biblioteca da USC destaca especialmente o seu fondo dedicado a
Galicia, así como o seu amplo fondo antigo. Ambos materialízanse na súa web
nestas coleccións dixitais,
resultado de diversos proxectos de dixitalización. Os recursos electrónicos
contratados por esta biblioteca agrúpanse en reBUSCa. No caso da Biblioteca da UVigo, a súa biblioteca dixital encóntrase no
apartado de Recursos-e.
Tamén é importante salientar a
importancia dos seus repositorios institucionais, que ofrecen acceso aberto ao
texto completo de documentos creados polos membros das universidades no seu labor
de investigación e docencia: o RUC na
UDC, Minerva na USC e Investigo
na UVigo.
Por outra banda, é necesario
citar que as redes sociais xogan un papel moi destacado na actualidade para
difundir temas de interese para o conxunto da comunidade universitaria. As 3
bibliotecas contan con presenza en diversas redes: no que respecta á BUSC,
podedes consultalas neste listado,
destacando ademáis o seu blog Fonseca.
Pola súa parte, a Biblioteca da UVigo conta tamén co blogDaBiblio. En canto á nosa
universidade, tamén ofrecemos un listado
da presenza das diferentes bibliotecas da UDC neste tipo de redes.
Centrándonos xa na Biblioteca Universitaria da UDC, conta
en total con 17 puntos de
servizo: o Servizo de Biblioteca (biblioteca central da UDC), 4 bibliotecas
intercentros e 12 de centros. O horario xeral de atención ao público é de 08.30
a 21.30, de luns a venres, que pode verse reducido en periodos de vacacións.
Ademáis da páxina web xeral da Biblioteca
Universitaria, case tódalas bibliotecas dos centros teñen páxina web
creada polo seu persoal, na que se difunden os servizos, recursos de
información, etc. aos que pode acceder a comunidade universitaria. A biblioteca
conta cunha extensa colección de libros e revistas en papel, DVD, libros
e revistas
electrónicas ou bases
de datos, entre outros.
Ademáis pretendemos achegarnos
mellor aos nosos usuarios mediante os cursos
de formación que se imparten ao longo do curso académico e que teñen como
obxectivo conseguir que os usuarios coñezan e utilicen cada vez máis os nosos
recursos.
De cara ao usuario destacamos uns
documentos normativos que poden ser de gran interese: as Normas de préstamo do Servizo
de Biblioteca da Universidade da Coruña e as Normas
de uso do préstamo interbibliotecario da Biblioteca da UDC.
Orientadas aos investigadores,
recentemente creáronse unas guías para
ofrecerlles, desde un único punto web, información que lles poida servir no
desenvolvemento da súa actividade investigadora como membros da UDC.
Xa por último, comentar que se
necesitades resolver calquera cuestión relacionada coa biblioteca, os nosos
recursos ou servizos, non dubidedes en contactar con nós. Podedes facelo
persoalmente nos mostradores de atención das diferentes bibliotecas,
telefónicamente,
por
e-mail ou a través dun formulario
web.
No hay comentarios:
Publicar un comentario