A xestión do medio ambiente na Universidade da Coruña

Imaxe: OMA

Desde a Universidade da Coruña (UDC) trabállase en diversas accións que nos permiten ser máis respectuosos co medio ambiente como compromiso para avanzar cara a un desenvolvemento sostible.

O centro encargado da coordinación, participación e realización de actuacións ambientais levadas a cabo pola UDC é a Oficina de Medio Ambiente (OMA). As súas funcións sitúanse en dous campos fundamentais: por unha banda, a xestión ambiental e, por outra banda, a implicación e concienciación da comunidade universitaria nas cuestións relacionadas co medio ambiente e a sustentabilidade. Entre as principais actuacións da OMA destacan:

• Dentro do compromiso por avanzar cara a un desenvolvemento sostible e respectuoso co medio ambiente, realiza a medición da pegada ecolóxica na UDC. Ademais, xunto ao servizo Emapic do Cartolab, desenvolveu ferramentas en liña para o cálculo da pegada ecolóxica individual de calquera persoa, permitindo calcular a pegada da xeración de residuos, do uso da enerxía no fogar ou da mobilidade.  
•  Xestión das hortas urbanas da UDC, que buscan avanzar na xestión ambiental sustentable do campus e contribuír á concienciación ambiental da comunidade universitaria e da sociedade en xeral.
• Proxecto de Custodia do Monte da Fraga, espazo forestal restaurado pola UDC, eliminando a maior parte dos eucaliptos e reforestándoo con especies autóctonas representativas do bosque galego.
• Campañas de sensibilización sobre a separación e xestión dos residuos na UDC.
• Campañas de aforro de auga e enerxía.
• Programa de préstamo de bicicletas, co obxectivo de promover o emprego da bicicleta como vehículo para a mobilidade sustentable, facilitando o acceso a unha bicicleta a aquelas persoas interesadas en facer uso da mesma para desprazarse aos centros universitarios.

Tamén hai que destacar a incorporación de varios centros da UDC ao programa internacional Green Campus para a preservación do medio ambiente desde a universidade, impulsado pola Foundation for Environmental Education, e xestionado en España pola Asociación de Educación Ambiental e do Consumidor (ADEAC). O obxectivo final é a consecución da Bandeira Verde, que simboliza o cumprimento dunha serie de criterios de sustentabilidade. A UDC sumouse a este programa no ano 2014 e desde entón continúa a sumar centros de participación.

Grazas a este compromiso, a UDC sitúase na posición número 5 a nivel de España e na 65 a nivel internacional segundo o ranking GreenMetric, que proporciona unha clasificación atendendo ás políticas relacionadas co medio ambiente (loita contra o cambio climático mundial, conservación da enerxía e a auga, reciclaxe de residuos…) nas universidades de todo o mundo.

Outro feito de interese é que en 2018 a UDC implantou entre os seus campus de especialización o Campus Sustentabilidade, vinculado co medio ambiente e que impulsa a excelencia no coñecemento para a transición a estilos de vida sustentables que protexan os recursos naturais, freen o cambio climático e promovan o benestar.

Para finalizar, queremos informarvos que como membros da comunidade universitaria da UDC tedes a opción de participar como voluntarios/as ambientais para levar a cabo distintas actividades relacionadas co medio ambiente e contribuír así á protección e preservación do mesmo. É recomendable informarse sobre o programa de actividades nas que se pode participar para elixir aquelas que máis se adapten aos intereses e dispoñibilidade da persoa interesada.