Nova infoguía do Servizo de Biblioteca sobre os Obxectivos de Desenvolvemento Sostible (ODS)

Hoxe vimos de publicar esta nova guía temática dentro das Infoguías do Servizo de Biblioteca sobre os Obxectivos de Desenvolvemento Sostible (ODS).

Lembrámosvos que en 2015 todos os Estados Membros das Nacións Unidas aprobaron 17 Obxectivos como parte da Axenda 2030 para o Desenvolvemento Sostible, na cal se establece un plan para acadalos en 2030. Estes obxectivos incorporan desafíos globais aos que nos enfrontamos día a día en diferentes ámbitos, como a pobreza, a desigualdade, o clima, a degradación ambiental, etc. 

No que respecta ás bibliotecas, a Federación Internacional de Asociaciones de Bibliotecarios y Bibliotecas (IFLA) impulsou que se recoñecesen as mesmas como institucións fundamentais para lograr os ODS, pois entre os obxectivos se incluíron aspectos como o acceso á información, a cultura, as TIC ou a alfabetización universal. Segundo a IFLA, entre as numerosas accións que promoven as bibliotecas para a implementación dos ODS destacan o acceso á información e á investigación para estudantado en todo o mundo, acceso a Internet, espazos inclusivos nos que o custo non sexa unha barreira para adquirir novos coñecementos e habilidades, documentación e conservación do patrimonio cultural, etc.

Nesta nova infoguía, ademais de proporcionar información xeral sobre os ODS e a súa relación coas bibliotecas, atópanse:

• Consellos para incorporar estes obxectivos no día a día.
• Iniciativas e actuacións que realiza a Universidade da Coruña (UDC), que en novembro de 2019 asinou un compromiso público coa Axenda 2030 de Desenvolvemento Sostible. Entre os principais centros que traballan neste tema destacan a Oficina de Cooperación e Voluntariado (OCV), a Oficina de Medio Ambiente (OMA) ou a UDC Saudable.
• Formación ofertada pola UDC nesta temática.
• Premios de traballos académicos dirixidos a estudantado da UDC que se distingan por ser especialmente relevantes en temáticas relacionadas coa Axenda 2030 e os ODS.
• Publicacións da UDC en Scopus segundo os ODS.

No que respecta ao Servizo de Biblioteca, queremos sumarnos ao compromiso cos ODS realizando accións que fomenten valores como a sostibilidade, a cooperación e o desenvolvemento. Para iso, na guía inclúense:

•          Iniciativas realizadas polas bibliotecas dos diferentes centros, que van desde a difusión periódica de noticias de sensibilización ou publicacións en redes sociais ata a realización de guías de lectura ou exposicións bibliográficas.
•          Unha relación das bibliotecas que ofrecen servizo de reciclaxe (papel/cartón, plástico, cartuchos de tinta, etc.)
•        Libros na BUDC para promover os ODS: propóñense unha serie de lecturas para que poidades coñecer os 17 ODS.
•          Infografías da BUDC: na primeira das infografías, co lema “Vólvete verde!”, comprometémonos cos ODS número 6, 7 e 12 a través das tres R da ecoloxía para contribuír á educación e sensibilización polo medio ambiente dos membros da comunidade universitaria. A segunda infografía, “Consellos para unha alimentación sostible”, contén información sobre como acadar unha alimentación responsabe e respectuosa co medio ambiente, en liña co ODS número 12.

En definitiva, podemos concluír que na actualidade o Servizo de Biblioteca está a traballar para contribuír a un mundo máis sostible e xusto, que se irá facendo visible nos seus centros e na súa páxina web con iniciativas como a elaboración desta guía para contribuír á difusión dos ODS e crear unha maior concienciación entre a comunidade universitaria sobre a importancia dos mesmos.